Qostanaı oblysynda sý basqan eldi mekenderdiń turǵyndaryn evakýasııalaýǵa polısııa qyzmetkerleri de belsene atsalysyp jatyr. Polısııanyń qutqarý jasaqtarynyń is-qımyly oblystyq PD bastyǵy Erlan Faızýllınniń tikeleı basshylyǵymen iske asyrylyp jatyr, dep habarlaıdy Egemen.kz.
О́ńirde sý tasqyny bastalǵan sátten bastap polısııa qyzmetkerleri TJD qutqarýshylarymen birlese otyryp 530-dan astam adamdy evakýasııalady.
Sonymen qatar polısııa evakýasııalanǵan turǵyndardyń úı-múlkiniń amandyǵyn qamtamasyz etý jumystaryn júrgizip jatyr.
«Kúsheıtilgen rejimde jumys istep jatyrmyz. Oblys aýmaǵyndaǵy avtokólik joldaryn 21 jerden sý shaıyp ketti. Onyń ishinde 1 respýblıkalyq, 5 oblystyq, 13 jergilikti mańyzǵa ıe jol bar. Basty mindet – qoǵam men joldyń qaýipsizdigin qamtamasyz etý. Áli sý tasqyny qaýpi túbegeıli seıilmeı tur. Sondyqtan turǵyndardyń amandyǵyn qamtamasyz etý maqsatynda biz qaýipti joldardy anyqtap, kólikterdiń sol baǵytqa shyǵýyna tyıym salyp otyrmyz», dedi PD bastyǵy Erlan Faızýllın.
Oblys boıynsha qoǵamdyq tártipti saqtaý jáne sý tasqynyna qarsy is-sharalarǵa 150 polısııa qyzmetkeri, QR IIM Ulttyq ulanynyń 100 áskerı qyzmetshisi, 49 tehnıka jumyldyrylǵan.
Polısııa departamentiniń janynan qurylǵan jedel shtab táýlik boıy jumys istep tur. PD bastyǵy qajet bolǵan jaǵdaıda shuǵyl áreket etýge daıyn turǵan qosymsha kúshterdiń jasaqtalǵanyn aıtty.