Juma kúni oblystyq Qazaqstan halqy Assambleıasy jarııalaǵan «Júrekten – júrekke!» respýblıkalyq aksııasy aıasynda qalalyq Dostyq úıindegi kómek jınaý pýnktinen Qostanaı oblysyna eki júk kóligimen gýmanıtarlyq kómek jóneltildi.
Júktiń kólemi – 40 tonna. Jolǵa shyqqan gýmanıtarlyq kómek kerýeninde negizgi qajettilikter qamtyldy. Azyq-túlik, kıim-keshek, sanıtarlyq-gıgıenalyq buıymdar, tósenish jabdyqtary, generatorlar, kúrekter, jaryq shamdary, shatyrlar sekildi kerek zattar jınaldy.
Aǵaıynǵa kóleńke jol tartqan júk kólikterine oblys ákiminiń orynbasary Erlan Qusaıyn aq jol tilep, mundaı ıgilikti istiń ármen qaraı jalǵasatynyn jetkizdi.
– Qazaqstan halqy Assambleıasynyń Dostyq úıinde arnaıy óńirlik shtab qurylyp, etno-mádenı birlestikterdiń, kásipkerlerdiń, turǵyndardyń arqasynda kómek jınaldy. Eki júk kóligimen 40 tonnaǵa jýyq azyq-túlik jáne sý tasqynyna qajetti qural-jabdyqtar jiberildi. Bul jumys jalǵasyn tabady. Osy ıgi iske muryndyq bolyp, basy-qasynda júrgen barsha azamatqa, qaraǵandylyqtarǵa alǵysymdy bildiremin. Azamattyń azamattyǵy osyndaı qıyn-qystaý kúnderde syndarly sátterde bilinetini sózsiz. Sondyqtan birge bolaıyq! Elimiz osyndaı ýaqytsha qıyndyqtan jyldam shyǵyp, ońalyp ketýine tilektespin, – dedi E.Beısembaıuly.
Buǵan qosa «Victory Trans» JShS kásiporny júkterdi tasymaldaý boıynsha shyǵyndardy tolyǵymen óz moınyna alyp, jomarttyq tanytty. Gýmanıtarlyq kómekti jınaýǵa Qazaqstan halqy Assambleıasynyń músheleri, etno-mádenı birlestikter ókilderi, kásipkerler, eriktiler, jastar, blogerler, óńir turǵyndary belsene qatysyp, bir kisideı járdemdesti.
– Jolǵa shyqqan kúnniń erteńinde Qostanaıǵa aman-esen jettik. Arqa jurtynyń amanat etip tapsyrǵan gýmanıtarlyq kómegin qabyldaý pýnktine tapsyrdyq. Qostanaılyqtar qıyn-qystaý kezeńde Qaraǵandy jurtyna birge bolǵandary úshin, aq peıili úshin alǵysyn jaýdyryp jatyr, – deıdi Qazaqstan halqy Assambleıasynyń múshesi Dýman Malaev.
Qaraǵandy oblysy