Tún jarymynda áleýmettik jelide Jambyl aýdanyna qarasty Jasórken aýylyn sý basty degen aqparat tarady. Áıtkenmen, jaǵdaı áleýmettik jeli qoldanýshylary taratqandaı ýshyqpaǵan, dep habarlaıdy Egemen.kz.
Resmı aqparatqa súıensek, bastapqyda jeti aýlaǵa jáne Muhtar Áýezov atyndaǵy mektep aýlasyna sý kirgeni anyqtalǵan. Al sońǵy málimetke júginsek, otyzdan astam aýlaǵa sý kirgen. О́ńir basshysy Erbol Qarashókeev bastap, tótenshe jaǵdaılar departementiniń mamandary qoshtap, der kezinde oqıǵa ornyna jetken.
Kún uzaqqa tolassyz jaýǵan nóser jańbyr saldarynan kelgen kólbeý sý aǵynynyń betin qaıtarý jumystary der kezinde qolǵa alynǵan.
«15 sáýir kúni keshki saǵat 20.30-da tolassyz jaýǵan nóser saldarynan jınalǵan sý Jasórken aýylyna jetken. Negizi 40 santımetrge deıin jetken. Aýyl boıynsha 30 aýlaǵa sý kirgen. Onyń ishinde úı ishine sý kirgen bir ǵana úı boldy. Zardap shekkender joq. Tótenshe jaǵdaı departamenti men polısııa departamentiniń ókilderi der kezinde aýylǵa kelgen. Aýyldyq ákimdik qyzmetkerleri de ýaqtyly jumysqa jumyldyrylǵan. Jalpy sany 300-den astam maman jumysqa kirisken. 22 motopompa, 60-qa jýyq birlik tehnıka jumys istep jatyr. Sý qoımalary shtattyq rejimde jumys istep tur. Shý, Talas ózenderindegi sý deńgeıi turaqty baqylaýǵa alyndy. Eshqandaı qaýip joq», deıdi óńir basshysy E Qarashókeev.
Sońǵy derekke sensek, bıiktigi bastapqyda 40 santımetrge jetken sý deńgeıi qazir 10 santımetrge deıin túsken. Sý basqan aýlalardy tazartý maqsatynda mamandar motopompalarmen úzdiksiz jumys istep jatyr.