Maıqudyqtaǵy saıabaqqa 1 100 aǵash egildi. Buǵan qosa bul demalys ornynda alma, sheten, mamyrgúl, moıyl, qaraǵan, qaraǵaı, terek, usaq japyraqty qaraǵash ósedi. Atalǵan aýmaqty abattandyrýǵa jergilikti turǵyndar, memlekettik qyzmetkerler, ekoeriktiler, bıznes ókilderi qatysty.
Aǵash egýge oblys ákimi Ermaǵanbet Bólekpaev ta qatysty.
– Prezıdenttiń bastamasymen elimizde «Taza Qazaqstan» ekologııalyq aksııasy bastaldy. Bul bir kúndik aksııa emes, uzaq merzimge sozylmaq. Oblysymyzdyń turǵyndary aýmaqtardy tazalaýǵa, kógaldandyrýǵa belsendi qatysyp jatyr. Aımaqtaǵy barlyq aýdan men qalada aǵash egilip jatyr. Mundaı jumys áli de jalǵasady. Qaraǵandynyń ózinde 90 myńnan asa aǵash egiledi. Kırzavod aýdanynda orman alqabyn qalpyna keltirý josparlanǵan. Belsendilik tanytqandaryńyz úshin barshańyzǵa rahmet, – dedi óńir basshysy.
Igilikti iske Álıhan Bókeıhan aýdany mektepteriniń dırektorlary da óz úlesin qosty.
– Kóktemniń bastalýymen bizde árdaıym senbilik ótedi. Biz mundaı is-sharalardan shet qalmaımyz. Biz dırektorlar korpýsymen saıabaqta aǵash ektik. Al ata-analar qaýymy, muǵalimder men oqýshylar mektep aýmaǵyn kógaldandyrýmen aınalysady. Barlyq aǵash tamyr jaıyp, qala turǵyndaryn qýantady dep úmittenemiz, – deıdi №85 mektep dırektory Saltanat Tursynova.
Úlkendermen birge balalar da aǵash egip, senbilikke qatysty.
– Bizdiń saıabaqtyń taza, jaqsy jáne ádemi bolǵanyn qalaımyn. Aǵammen birge keldim. Úlkenderge kómektestim, kóshetter ekken shuńqyrlarǵa topyraq salyp otyrdym. О́zim bir aǵash ektim. Men saıabaqqa jıi baryp, onyń qalaı ósip jatqanyn baqylap turamyn, – deıdi 7 jastaǵy Arsenıı Obert.
Bıyl Álıhan Bókeıhan aýdanyna 10 myńnan asa túrli aǵash egiledi. Buǵan qosa Qaraǵandyda áýejaı aýmaǵyna 1000 terek egildi. Aksııaǵa 300-den asa adam qatysty. Aldaǵy ýaqytta kóshetterge kútim jasalady.
Qaraǵandy oblysy