10-20 mamyr aralyǵynda Almaty polısııasy kúsheıtilgen rejımde qyzmet etedi. Osy kúnderi «Quqyqtyq tártip» jedel aldyn alý is-sharasy ótedi, dep jazady Egemen.kz.
Jedel aldyn alý is-sharasyn ótkizýge Ulttyq ulannyń áskerı qyzmetshileri, polısııa qyzmetteri men bólimsheleriniń qyzmetkerleri jumyldyrylǵan.
Jedel sharanyń maqsaty - qoǵamdyq tártipti saqtaý, kóshelerde jáne basqa da qoǵamdyq oryndarda quqyq buzýshylyqtyń aldyn alý. Atalǵan is-shara aıasynda Almatyda polısııa jasaqtarynyń sany artady.
Polısııa qyzmetkerleri men áskerı qyzmetkerler kóshelerdi, aýlalardy, alańdardy, saıajaılardy jáne basqa da qoǵamdyq oryndardy aralap, tekseredi. Quzyrly organ ókilderi kóshi-qon zańnamasyn, sonyń ishinde qurylys jáne saýda salalarynda quqyq buzýshylyqtardy anyqtaý maqsatynda tekserýler júrgizip jatyr. Sondaı-aq azamattyq qarý ıeleri men polısııanyń profılaktıkalyq esebinde turǵan adamdar da baqylanbaq.
«Habar-osharsyz ketken adamdardy, qylmyskerlerdi izdestirý, sondaı-aq bótenniń múlkin urlaýmen, páter tonaýmen, urlyqpen jáne t.b. aınalysatyn qylmystyq toptardy áshkereleý boıynsha PD-nyń jedel bólimsheleriniń jumysy kúsheıtildi», delingen IIM habarlamasynda.