Qara óleńniń qaǵbasy sanalǵan Qaraǵandyda eki kún boıy óleń-jyrdyń rýhy jelpidi. Bıyl elimizge belgili aıtýly aqyndardan bastap, talantty jas shaıyrlardyń basyn qosyp, búgingi ádebıettiń damý baǵytyn aıqyndaý hám talqylaý maqsatynda qolǵa alynǵan respýblıkalyq «Qaraǵandy kóktemi» poezııa festıvali ekinshi márte jelken kerdi. Alqaly jıynnyń ashylý saltanaty Qaraǵandydaǵy Dostyq úıinde ótti. Aýqymdy is-shara oblys jáne Qaraǵandy qalasy ákimdikteriniń qoldaýymen, Jazýshylar odaǵy Qaraǵandy oblystyq fılıalynyń uıymdastyrýymen dástúrge aınalyp keledi. Ashylý saltanatynda oblys ákiminiń orynbasary Ermek Alpysov qatysyp, Qazaqstan Respýblıkasynyń Memlekettik keńesshisi Erlan Qarınniń quttyqtaýyn jetkizdi.
Ermek Alpysov Erlan Qarınniń quttyqtaý hatyn aqyn, Jazýshylar odaǵynyń Qaraǵandy oblystyq fılalynyń tóraǵasy Janat Jańqashulyna arnaıy tapsyrdy. Ol hatta: «Qazaq qashanda sóz ónerin joǵary baǵalaǵan. Biz – «О́leń – sózdiń patshasy, sóz sarasy» dep, jyr qadirin jete túsingen elmiz. Rýhanııatymyzdyń altyn qazyǵy ispetti jyraýlar dástúrin, sondaı-aq uly Abaıdan bastaý alatyn ádebıet alyptarynyń dara jolyn búgingi aqyndarymyz laıyqty jalǵastyryp keledi. Mádenıetimizdiń óresin keńeıtip, ony barynsha damytý – memlekettiń mańyzdy basymdyqtarynyń biri. Osy oraıda shyǵarmashyl zııaly qaýym ókilderi erekshe ról atqarady. Bul festıval aqyndardyń aǵa býyny men jas tolqynnyń arasyndaǵy rýhanı sabaqtastyqty saqtaýǵa jáne tól ádebıetimizdi jan-jaqty nasıhattaýǵa zor úles qosady dep senemin», delingen.
Festıvalǵa Ulyqbek Esdáýlet, Serik Aqsuńqaruly, Ońaıgúl Turjan, Suraǵan Rahmet, Qasymhan Begman, Svetqalı Nurjan, Gúlnár Salyqbaı, Janat Áskerbekqyzy, Maraltaı Raıymbek, basqa da elge tanymal aqyndar arnaıy keldi. Jazýshylar odaǵy tóraǵasynyń orynbasary Qasymhan Begmanov óz kezeginde:
«Qaraǵandynyń aqyndaryna alǵysym sheksiz! Ekinshi jyl qatarynan qalamgerlerdiń basyn qosyp otyr. Osyndaǵy fılıal dırektory, aqyn Janat Jańqashulynyń eńbegin erekshe atap ótkim keledi. Festıvalda búgingi qazaq poezııasynyń birshama máselesi kóteriledi. Mundaı is-shara aqyndarǵa aýadaı qajet. Odaq tóraǵasy Mereke Qulkenovtiń ystyq sálemin qabyl alyńyzdar», dedi.
Sonymen qatar Serik Aqsuńqaruly, Ulyqbek Esdáýlet te arnaıy sóz sóılep, izgi tilegin bildirdi.
Ashylý rásiminen keıin qalamgerler dóńgelek ústelge jaıǵasty. Dóńgelek ústeldi Janat Jańqashuly tizgindep, oqyrman, jalpy, kitap máselesi jaıynda sóz qozǵady. Bekitilgen spıkerler baıandama jasap, qazirgi qazaq poezııasyndaǵy túrli máseleni ortaǵa saldy. Baıandamashylar qatarynda qaraǵandylyq aqyn, Qazaqstan Jazýshylar odaǵynyń múshesi Saltanat Qaıyrbek te bar. Ol kitap satylymy taqyrybyn qozǵady.
Sonymen qatar dóńgelek ústel basynda Ulyqbek Esdáýlet aýdarmashylar haqynda óz pikirin aıtty.
«Shyǵarmalardy shet tiline aýdarý joldaryn tabý áste qıyn emes. Qıyndyq týdyrmaıdy da. Tek, másele mynada. Bizde kásibı talantty aýdarmashylar joq. Sondaı aýdarmashylar tabý qıyn», dedi aqyn.
Budan bólek Svetqalı Nurjan, Aqberen Elgezek, Dáýren Berikqajy syndy aıtary bar aqyndar oıyn ortaǵa salyp, baspahana máselesi jaıynda sóz qozǵady.
«Qaraǵandy kóktemi» poezııa festıvalindegi dóńgelek ústelden soń, arqaly aqyndar Sáken Seıfýllın atyndaǵy oblystyq qazaq akademııalyq drama teatryna at basyn tiredi. Resmı bóliminen soń, Alashtyń aıaýly aqyndary arqalanyp óleń oqydy. Qabyrǵaly qalamgerlerdiń qasıet qonǵan Qasymnyń topyraǵyn saǵynyp kelgenderi erekshe sezildi.
Keshtiń shymyldyǵyn «Qazaqtyń ekinshi Ámiresi» atanǵan Serjan Musaıyn Qasymnyń «Aqsáýlem» ánimen ashqanyn parasatty poezııaǵa jasalǵan qurmet dese de bolatyndaı. Jalpy, festıvaldyń laıyqty deńgeıde ótýine uıytqy bolǵan Qaraǵandy qalasy ákiminiń orynbasary Lázzat Tókenqyzy ádebı keshtiń ortasynda bolyp, birqatar aqynǵa qala ákimi Meıram Muratulynyń quttyqtaý hat tabystady.
Almatydan arnaıy kelgen Jazýshylar odaǵy basqarma tóraǵasynyń orynbasary, aqyn Qasymhan Begmanov Qaraǵandyny «qara óleńniń óz ólkesi» dep, festıvaldyń joǵary deńgeıde ótip jatqanyn aıta ketip, óleń oqydy.
Aqyn Ulyqbek Esdáýlet te sóz alyp, Qasym topyraǵynyń qasıetin, qazaq poezııasyndaǵy Qaraǵandynyń ornyna aıryqsha toqtalyp ótti. Sodan soń aqyn Svetqalı Nurjanǵa, Memlekettik syılyqtyń laýreattary Serik Aqsuńqarulyna, Gúlnar Salyqbaıǵa Túrksoı-dyń «Altyn medalin» taqty.
Poezııa festıvaliniń ekinshi kúninde aqyndar Maıqudyqtaǵy kenshiler murajaıyna at basyn burdy. Sodan keıin rýhanııat ortalyǵyna aınalyp kele jatqan E.Bóketov atyndaǵy Qaraǵandy zertteý ýnıversıtetinde jas býyn ókilderiniń poezııa keshi dúrkiredi. Jas aqyndar óleńderimen tuǵyrǵa qonǵan klassıkterdiń aldynda arqyrady. Poezııa keshi bastalmas buryn Ulytaý oblysynyń úkilegen úmiti Abzal Maqash pen arý Almatydan kelgen talantty aqyn Roza Aspanqyzy sahnaǵa shaqyryldy. Sahnada kitaptarynyń tusaýy kesildi. Roza Aspanqyzy óziniń alǵashqy kitabyn «О́zin oıatqan adam», al Abzal Maqash «Májnún munarasy» dep atapty. Bul kitaptyń jaryqqa shyǵýyna E.Bóketov atyndaǵy Qaraǵandy zertteý ýnıversıtetiniń basqarma tóraǵasy, rektory Nurlan Dýlatbekov qoldaý kórsetkenin atap ótken jón. Eki kitap – byltyrǵy festıvaldiń sharapaty. Sol festıvalda qos aqyn tańdalǵan.
Sahnada aqyndardyń atynan Ulyqbek Esdáýlet sóz sóıledi. «Eń uly aqyn – jas aqyn!». Bul Maraltaı Raıymbekulyna jazǵan óleńim edi. Alǵashqy jyr jınaqtary dúnıe esigin ashqan eki jas aqynda arman joq. Búkil eldiń nazary senderde. Alash aqyndarynyń aldynda tursyńdar. Mundaı baqyt árkimge buıyra bermeıdi. Qaraǵandynyń qashanda jóni men qurmeti biz úshin bólek. Qazybektiń, Buqar jyraýdyń, er Mádıdiń, Qasymnyń, Álıhan bastaǵan Alash elıtasynyń basqan topyraǵyna kelip turmyz. Qazaq qalamgerleriniń, oqyrmandarynyń nazary Qaraǵandyda! Keleshekte qazaq ádebıetine úlken olja ákelýlerińe tilektespiz. Jarqyrańdar, jaınańdar!» dedi Ulyqbek Esdáýlet.
Ulyqbek Esdáýlettiń sózinen keıin aqyndar óleńnen ózen aǵyzdy. Gúlnar Salyqbaı óleń oqyǵanda zaldaǵy kórermen de birge kúbirlep otyrdy. Al Maraltaı Raıymbekuly «Ar» óleńin oqyp bastap edi, zaldaǵy jurt ári qaraı oqı jóneldi. Aqyn bolsa, baladaı qýanyp, qolyndaǵy mıkrofondy halyq jaqqa burdy. Aqyn úshin bul úlken baqyt emes pe?
Aqyndardan keıin Shyńǵys Sársenbaev án shyrqady. Ánnen keıin sahnaǵa keıingi tolqyn ókilderi shyqty. Almatydan Bekzat Smadııar, Roza Aspanqyzy, Shymkentten Araılym Muratálıeva, Pavlodar oblysynan Jolaman Áıtken, Túrkistannan Elaman Tóleýtaı men Rysgúl Dosjanova, Qaraǵandynyń atynan Ádilet Shopen, Erik Naryn, Eraly Ǵanı men Nurdáýlet Baqytuly shyqty.
Festıvaldyń ekinshi kúni Jeńis saıabaǵyndaǵy serýenmen túıindeldi. Aqyndar Qaraǵandy kókteminiń aýasymen tynystap, ádebıet tóńireginde óreli áńgime órbitti. О́leńsúıer qaýym aıaýly aqyndaryn rııasyz qoshemet kórsetip, qımaı shyǵaryp saldy.
Qaraǵandy oblysy