Senat Spıkeri Máýlen Áshimbaevtyń tóraǵalyǵymen ótken Palata otyrysynda depýtattar Úkimettiń jáne Joǵary aýdıtorlyq palatanyń 2023 jylǵy respýblıkalyq bıýdjettiń atqarylýy týraly esepterin qarady, dep habarlaıdy Egemen.kz Senattyń baspasóz qyzmetine silteme jasap.
Esepterdi qaraý barysynda ótken jyldyń qorytyndysy boıynsha respýblıkalyq bıýdjettiń negizgi kórsetkishterine qol jetkizilgeni atap ótildi. Naqty aıtqanda, ónerkásip óndirisiniń kólemi 4,3 paıyzǵa ulǵaıdy. Jyldyq ınflıasııa deńgeıine qatysty da oń dınamıka tirkelip otyr.
«Talqylaý barysynda senatorlar fıskaldyq tártip, memlekettik borysh, ekonomıkanyń naqty sektoryn qoldaý, ınfraqurylym jáne basqa da mańyzdy salalarǵa toqtalyp, ózekti problemalardy kóterdi. Osy rette Úkimet músheleri búgin aıtylǵan barlyq usynysqa mán berip, olardy jumys barysynda eskerýi asa mańyzdy», dedi Máýlen Áshimbaev.
Sondaı-aq Senat tóraǵasy óz sózinde: «Memleket basshysy Joldaýynda makroekonomıkalyq saıasatty qaıta jandandyrýdy tapsyrdy. Qazirgi tańda Parlament qabyrǵasynda jańa Bıýdjet kodeksiniń jobasy talqylanyp jatyr. Jańa zańnamalar, onyń ishinde Salyq kodeksi men «Memlekettik satyp alý týraly» zań el ekonomıkasynyń údemeli damýynyń berik negizi bolýǵa tıis. Osy baǵytta Senat Úkimetke qajetti zańnamalyq qoldaý kórsetýge daıyn», dedi Senat Tóraǵasy.
Esepterdi qaraý kezinde Qarjy mınıstri Mádı Takıev, Ulttyq Banktiń Tóraǵasy Tımýr Súleımenov jáne Joǵary aýdıtorlyq palatanyń Tóraǵasy Álıhan Smaıylov baıandama jasady. Otyrysqa Premer-Mınıstrdiń orynbasarlary, mınıstrler jáne agenttikter men ulttyq kompanııalardyń basshylary qatysty.
Úkimettiń esebi men Joǵary aýdıtorlyq palatanyń qorytyndysyn talqylaý nátıjesinde senatorlar Parlament Palatalarynyń birlesken otyrysynda atalǵan máseleni qaraý kezinde Senat atynan qosymsha baıandama jasaý úshin senator Bekbolat Orynbekovtiń kandıdatýrasyn bekitti.