Ana men balanyń saýlyǵy – tutas ulttyń amandyǵy degen sóz. Bul aq halat kıgen akýsherlerdiń boıtumar sózi, ustanymy. Áý basta telejýrnalıst bolamyn degen armanyn anasynyń bir aýyz ótinishimen medısına mamanyna almastyrǵan akýsher-gınekolog Jarqyn Nurkeeva osy kúni óz kásibiniń kánigi maıtalmanyna aınalyp úlgerdi.
Jarqyn Syzdyqqyzy bul jolda úzdiksiz oqydy, tynymsyz eńbektendi. Anasynyń «bizdiń úıge bir dáriger kerek», degen bir aýyz sózin jerge tastamaǵan ol «anam, qolymnan keletinin bilgen eken ǵoı», deıdi. Bala kezden kele jatqan armany – telejýrnalıst bolý edi. Sodan bolar aldyna alańdap kelgen júkti analardyń aldymen jyly sózimen janyn shýaqqa bóleıdi. Sosyn baryp qana em-domyna kirisedi.
Osylaısha, Jarqyn Syzdyqqyzy 1996 jyly Qaraǵandynyń medısınalyq ınstıtýtynyń jalpy medısınalyq fakýltetine oqýǵa túsken. 2002 jyly emdeý fakýltetinde akýsher-gınekolog mamandyǵyn tereńdetip oqyp, odan keıin taǵy bir jyldyq bilimin ınternatýra arqyly jetildirdi. Bilim alyp júrip, praktıkaǵa da qatysyp, tájirıbesin ábden tolyqtyrǵan jas meıirger isi dıplomyna qol jetkizgen soń alǵashqy eńbek jolyn Soltústik Qazaqstan oblysy Shal aqyn aýdanyndaǵy ortalyq aýrýhananyń bosaný jáne gınekologııa bólimshesiniń meńgerýshisi bolyp bastady. Sonda bes jyl eńbek etip, ekinshi dárigerlik kategorııasyn aldy. Aýdandyq aýrýhanadan biliktiligin molaıtyp alǵan ol qaıta Qaraǵandyǵa qonys aýdardy. Oblystyq perzenthanada 2022 jylǵa deıin akýsher-gınekolog bolyp eńbek etedi. Osy ýaqyt aralyǵynda aımaqqa myqty akýsher retinde aty tanyldy. Júkti analardyń barlyǵy tájirıbesi tolyqqan, ana men bala densaýlyǵynyń bilgiri bolǵan Jarqyn Syzdyqqyzyn arnaıy izdep keledi eken. Eńbegi elenip, joǵary sanattaǵy dáriger atandy. Jarqyn Syzdyqqyzy 2022 jyldan bastap №2 perınataldyq ortalyqtyń meńgerýshisi. Iаǵnı bilgir maman, bilikti basshy Prıshahtınskidegi perzenthanaǵa jetekshilik etip otyr.
Jarqyn Syzdyqqyzynyń medısına salasyndaǵy jalpy eńbek ótili – 25 jyl. Osy bir jyldar ýaǵynda qanshama qyzyqpen de, qıyndyqpen de betpe-bet kelgen.
Jumysyna alǵash kirisken jyly shalǵaı aýyldaǵy bir ananyń tolǵaǵy jetip, óz kólikterimen aýdan ortalyǵyna kele jatady. Kún bolsa, 40 gradýs aıaz. Oǵan alańdaǵan jas akýsher jedel-járdem kóligimen olarǵa qarsy bet alady. Sodan orta jolda kezigip, jedel-járdem kóliginiń ishinde aspaı-saspaı aman-esen bosandyrady. «Degenmen, sol joly jaýapkershilikti qatty sezindim. Syrtta aıaz qysyp tur. Asa qatty kerek-jaraǵymyz da joq. Bir ózim ǵana. Onyń ústine endi ǵana jumysqa qabyldanǵan kezim. Sodan bastap ár ana men balaǵa úlken jaýapkershilikpen, asa uqyptylyqpen qaraý keregin túsindim. О́ıtkeni bir emes, eki adamnyń densaýlyǵy moıynyńda turady», deıdi bilikti akýsher.
Túrli qyzyqtarǵa da tap bolyp jatady. Ásirese aq kóılekpen kelgen qalyńdyqty bosandyryp alǵanyn áli qyzyq qylyp aıtady. «Sol joly jedel-járdem kóligi quıǵytyp kelip, sıgnalyn qaıta-qaıta basa berdi. Ishindegi júrgizýshi «kelin keldi, kelin keldi», dep daýystap shyqty. Biz túsinbeı turmyz. Sóıtsek, toıda otyryp tolǵaǵy jetken kelinshek eken. Perzenthanaǵa kádimgi aq kóılekpen kirgizip aldyq. Aman-esen bosandy. Ony estigen toıda otyrǵan týystary perzenthanaǵa kelip, ármen qaraı dýmandatqan. Osy bir erekshe sát esimizde», dep jyly esteligin jymıyp jetkizdi abzal jan.
Ardaqty akýsher jyl saıyn bilimin jetildirip, tájirıbesin tereńdetip otyrady. Únemi izdenis ústinde. Onsyz taǵy bolmaıdy deıdi. О́ıtkeni medısına ǵylymy da kóz ilestirmes jyldamdyqpen damyp keledi. Ozyq tehnologııany oqyp, bilýdi ózine talap etip qoıǵan. Ár jyly Izraıl, Túrkııa, Reseı elderine baryp, arnaıy kýrstardy oqydy. Ol memleketterdiń ana men bala densaýlyǵyna qalaı qaraıtynyn, qandaı kómek kórsetetinin oqyp-toqıdy. Sol arqyly tájirıbesin baıytyp, kásibıligin shyńdaıdy.
Jarqyn Syzdyqqyzynyń kóp jylǵy eńbegi eleýsiz qalǵan emes. «Altyn dáriger» medaline, «Kásipodaqqa sińirgen eńbegi úshin» tósbelgisine ıe bolǵan. Aldyńǵy jyly mınıstrliktiń «Densaýlyq saqtaý salasynyń úzdigi» mártebeli marapatyna qol jetkizgen.
Eńbek jolynda mundaı bıik dárejege qol jetkizýine ómirlik joldasynyń da qoldaýy bar. Muny akýsher bizge bylaı jetkizdi: «Jan-jarym ekeýmiz sonaý stýdent kezimizde otaý qurdyq. О́mirdiń ár baspaldaǵyn sodan beri birge basyp kelemiz. Ol maǵan, men oǵan qoldaý bildiremin. О́ıtkeni jaýapkershiligi joǵary jumystyń aýyrtpashylyǵy árdaıym basym bolady. Joldasym da medısına salasynda eńbek etetindikten, bir-birimizdiń janymyzdy túsinemiz».
Iá, joldasy Samat Nurkeev te oblystyq klınıkalyq aýrýhananyń bilikti proktologi, hırýrgi. Joǵary sanattaǵy dáriger. «Altyn dáriger» medaliniń ıegeri. Bir shańyraqtyń astyndaǵy eki birdeı «altyn dáriger» bir ul, bir qyz tárbıelep otyr. Uly Nurálı Nazarbaev ıntellektýaldyq mektebiniń 10-synybyn bitirdi, qyzy Jansulý «Murager» mektebiniń 5-synybyn támamdady. Ekeýi de ata-analary sekildi «altyn dáriger» atanyp, emdelýshilerge shıpa darytqysy keledi.
Qaraǵandy oblysy