Soltústikte jantúrshigerlik qaıǵyly oqıǵa boldy. Petropavl aýrýhanalaryna tamaqtan ýlanǵan bes adam - bir otbasy músheleri tústi. Eki bala qaıtys bolǵan, dep habarlaıdy Egemen.kz.
Ata-anasynyń aıtýynsha, qaıǵyly oqıǵadan bir kún buryn otbasy aýyldaǵy dúkennen óńdelgen taǵam men gazdalǵan sýsyn alǵan. Olardyń ýlanýyna osy sebep bolýy múmkin, ony arnaıy komıssııa tekseredi.
Astana telearnasynyń tilshilerine Qyzyljar aýdanyna qarasty Nadejka aýylynyń turǵyndary bári óte tez bolǵanyn aıtqan. Olardyń kópshiligi oqıǵany egjeı-tegjeıin bilmeıdi, biraq bári keshki astan keıin otbasy aýyryp qalǵanyn aıtady.
- Tamaq ishken, boldy. Keıin uıqyǵa jatqan. Tańerteń kishkentaı úsh jasar Vasek qaıtys bolǵan. Olardy qaladaǵy aýrýhanaǵa alyp ketti. Al keshke qyzdary...
Balalar ýlanyp qalǵan deıdi. Satyp alyp jegen. Túshpara bolýy kerek. Jergilikti medbıkeni keshe túngi saǵat ekide úıge shaqyrǵan. Úsheýi qusqan. Oqıǵa ornyna kelgen feldsher bárin qarap, alǵashqy medısınalyq kómek kórsetken, - deıdi turǵyndar.
- Sol mekenjaıǵa tańǵy saǵat 8 shamasynda qońyraý tústi. Medbıke baryp, 2021 jyly týǵan balanyń bıologııalyq ólimin anyqtady. Eki jedel járdem kóligimen 1996 jyly týǵan anasy juqpaly aýrýlar bóliminiń alǵashqy qalalyq aýrýhanasyna jetkizildi. 2017 jáne 2014 jyly týǵan eki bala oblystyq balalar aýrýhanasyna jetkizildi. Qaralyp, dereý reanımasııa jáne qarqyndy terapııa bólimshesine jatqyzyldy. 2017 jyly týǵan qyz aýyr jaǵdaıda, turaqsyz bolyp, 20:50-de ókpeni jasandy jeldetýge qosyldy, júrgizilip jatqan emniń tolyq keshenine qaramastan, bala qaıtys boldy, - deıdi Soltústik Qazaqstan oblysy densaýlyq saqtaý basqarmasy bastyǵynyń orynbasary Raısa Qusaıynova.
Onyń aıtýynsha, on jastaǵy balanyń jaǵdaıy turaqty aýyr. Onyń anasy qazir reanımasııada.
- Qyzyljar óńirinde eki bala qaıtys bolyp, úsh týysy medısınalyq mekemege jetkizilgen bir otbasynyń ýlaný deregi boıynsha polısııa sotaldy tergeýdi bastady. Atalǵan fakt Sotqa deıingi tergep-tekserýdiń biryńǵaı tizilimine "Abaısyzda adamdardyń jappaı ýlanýyna jáne abaısyzda eki nemese odan da kóp adamnyń ólimine ákep soqqan sanıtarlyq erejeler men gıgıenalyq normalardy buzý" baby boıynsha tirkeldi, - dedi SQO PD Tergeý basqarmasy bastyǵynyń orynbasary Azat Qusaıynov.
Oqıǵadan keıin oblystyq densaýlyq saqtaý basqarmasy bul isti tekserý úshin arnaıy komıssııa qurǵan. Eki balanyń óliminiń aldyn ala sebebi - toksıkalyq tamaq ınfeksııasy, ınfeksııalyq toksıkalyq shok jáne mıdyń isinýi. Barlyq bıologııalyq materıaldar saraptamaǵa jiberilgen.