Múmkindigi shekteýli jandarǵa qamqorlyq jyl ótken saıyn artyp keledi. Máselen, jaqynda ǵana Qaraǵandyda múgedekter arbasyn jóndeıtin alǵashqy ınva qyzmet kórsetý ortalyǵy ashyldy. Mundaı ortalyq óńirimizde buryn-sońdy bolmaǵan edi.
Endi múmkindigi shekteýli jerlesterimiz syrttan maman izdemeıdi, arbasynyń aqaýy bar bólshekterin basqa jaqqa jóndetip, ýaqytyn joǵaltpaıdy. Jańadan ashylǵan qyzmet kórsetý ortalyǵy qajet nárseniń bárin tegin jasaıdy. Eger jóndeý ýaqyty sozylatyn bolsa, ornyna ýaqytsha basqa arba beredi.
Servıstik ortalyqtyń jyl saıyn 300-ge deıin múgedekter arbasyn jóndeı alatyn múmkindigi bar. Ortalyqqa júgingen jandardyń arbasynyń kináratyn ne sebepten ekenin anyqtap, birden jóndeýmen aınalysady. Sheberhanada arbanyń oryndyǵyn jańalaý, dóńgelegin aýystyrý sekildi qosymsha qyzmetterin paıdalanýǵa bolady. Onymen qosa, osyndaǵy mamandar arbany qalaı durys paıdalaný kerektigin, onyń kútimin úıretedi.
– Múmkindigi shekteýli jandarǵa arnalǵan arbalar – mobıldi bolýǵa múmkindik beretin jalǵyz kólik quraly. Eger ol buzylsa, aıtarlyqtaı qıyndyqqa tap bolamyz. Buryn arbamnyń buzylǵan bólshekterin jóndetý úshin Reseıge jiberetinmin. Onyń jóndeýi bar, baryp kelýi bar, biraz ýaqyt alatyn. Kádimgideı qınalyp qalatyn edim. Al usaq-túıek jóndeıtin sharýalary bolsa, dánekerleýshilerge, shınomontajdaǵy qyzmetkerlerge júginetin edik. Kóbisi jóndeýge kelispeıtin. О́ıtkeni búldirip alamyz dep alańdaıtyn. О́tken jyly múgedektigi bar adamdardyń atynan aımaq basshysy Ermaǵanbet Bólekpaevqa qalada servıstik ortalyq ashýdy ótingen bolatynmyn. Mine, bizdiń ótinishimizge qulaq túrdi. Endi biz munda arbamyzdy jóndetýge kelemiz, ıa bolmasa sheberdi úıge shaqyra alamyz, – deıdi oblys ákiminiń múgedektigi bar adamdar máseleleri jónindegi keńesshisi Nııaz Súndetálıev.
Jańa ortalyqta 12 adam qyzmet kórsetedi. Onyń segizi – múmkindigi shekteýli jandar.
– Qyzmet kórsetý ortalyǵynda múgedektigi bar adamdar arbasyz qalýdyń qandaı bolatynyn óz basynan ótkergen, múmkindigi shekteýli sheberler jumys isteıtin bolady. Biz barlyǵy 12 adamdy jınadyq, onyń segizi – múmkindigi shekteýli jandar. Jóndeý men tehnıkalyq qyzmet kórsetýden bólek, bizde arbany durys tańdaý qyzmeti de bar. Sonymen qosa mamandarymyz qajet bolǵan jaǵdaıda kelýshilerge sıfrlyq qyzmetterdi alýǵa kómektesedi. Bul – bizdiń ekinshi fılıalymyz. Alǵashqysyn segiz jyl buryn Astanada ashqanbyz. Ondaǵy jumys óte jaqsy júrip jatyr, – deıdi «DOS» Táýelsiz ómir» qoǵamdyq birlestiginiń tóraǵasy Dına Esildınova.
Ortalyqtyń ashylý saltanatynda birlestiktiń quryltaıshylary paraarmrestlıngten álem chempıony Nıkıta Ermakovqa jáne erekshe balanyń anasy Gúlızar Ahmetovaǵa zamanaýı múgedekter arbasyn tartý etti.
– Men jalǵyzbasty anamyn. Batyr esimdi 12 jastaǵy ulymdy tárbıelep otyrmyn. Bala kezinen sal aýrýymen aýyrady. Jaqynda bizdiń kireberiste turǵan qymbat arbamyzdy qıratyp ketti. Men bul jóninde áleýmettik jelige jazǵan edim. Sonda kóptegen jaqsy adam qolushyn sozýǵa daıyn ekenin bildirdi. Jaqsylyǵyn jarııa etkisi kelmegen bir jomart júrek aǵamyz serýendeýge arnalǵan jańa arba syılaǵan. Mine, endi qoǵamdyq birlestik bizge úı ishinde júretin bir arba syılap, qýantyp jatyr, – deıdi Gúlızar Ahmetova.
Iá, múmkindigi shekteýli jandar endi astyndaǵy arbalaryn alystan jóndetpeıtin boldy. Ári kerek-jaraǵyna osy bir ortalyqtyń kómegimen qol jetkize alady. Bul da bolsa ınvaortalyqtyń orasan ıgiligi der edik.
Qaraǵandy oblysy