Kostenko shahtasynda bolǵan qaıǵyly oqıǵa el-jurttyń janyn aýyrtyp, qabyrǵasyn qaıystyrdy. Kómir qazamyz dep ómirin qıǵan kenshilerge taǵzym kórsetilip, eki birdeı eskertkish qoıyldy. Qos músinshiniń qolynan shyqqan eskertkishtiń bireýi shahta janyna, ekinshisi ortalyq saıabaqqa qoıyldy.
Qaraǵandylyq sýretshi, músinshi Igor Bagramov Kostenko shahtasynda qaza tapqan 46 kenshiniń qurmetine qoıylatyn memorıaldyń jobasyn byltyr bastaǵan edi. Joba daıyn bolǵanda ázirlemeni qaza tapqandardyń otbasylaryna kórsetken.
Ortalyq saıabaqtaǵy eńseli eskertkishti Igor Bagramov óziniń músinshi áriptesi Taras Kıshkarevpen birge jaqynda ǵana aıaqtady. Bıiktigi – 3 metr 20 santımetr. Eskertkishti 2006 jyly qaza tapqan kenshilerdiń qurmetine ornatylǵan granıt eskertkishiniń janyna qoıǵan.
«Eskertkishke aparatyn shaǵyn jol bar. Tuǵyry qara granıtten jasalǵan jáne munda birinshi eskertkish sııaqty, qaza tapqan barlyq 46 kenshiniń aty-jóni oıylyp jazylǵan. Betonnan jasalǵan músin – alysqa kóz tastap turǵan qarapaıym kenshiniń beınesi», deıdi I.Bagramov.
Kostenko shahtasynyń janynda ornalasqan úsh metrlik memorıaldyń qańqasy metaldan. Eskertkishtiń negizgi materıaly – gabbro tegistelgen qara granıt. Granıtke qaza tapqan kenshilerdiń esimderi men apat kúni qashalyp jazylǵan. Eskertkishten kenjarǵa kireberisti kórsetetin jartylaı dóńgelek doǵasy bar qabyrǵany kórýge bolady. Shahtaǵa kirip bara jatqan kenshiler beıneleri birte-birte bultqa sińgendeı.
Memorıal qabyrǵasynda jaryqshaq qaıǵy men sherdi sezindiredi. Eskertkishtiń ekinshi jaǵynda kenshiniń baskıimi qashalyp salynǵan. Aınalasyna gúlder egilip, jan-jaǵy abattandyrylǵan. Jaryq shamdary men taǵzym jasaýshylarǵa oryndyq qoıylǵan. Buǵan qosa eskirtkishti aınaldyra qaza tapqan kenshiler sanyna sáıkes 46 jas qaıyń egildi.
«Eskertkish alańyna tastósem tóseldi. Shaǵyn qorshaýmen qorshaldy. 340 sharshy metr aýmaq jaýyn-shashyn sýy jınalmaıtyndaı, kólbeý jerde ornalasqan. Sondaı-aq erekshe qajettilikteri bar, ıaǵnı arbadaǵy adamdar da kele alatyndaı yńǵaıly etip jasalǵan. Qazir jaryqtandyrý tirekteri úshin elektr qýatyn tartý jumystary júrgizilip jatyr. Sońǵy atqarylar jumys – kógaldandyrý. Aldaǵy birneshe kúnde aýmaqty abattandyrý aıaqtalady», deıdi músinshi.
О́tken jyldyń 28 qazanyna qaraǵan túni Kostenko atyndaǵy shahtadaǵy jarylys saldarynan 46 adam qaza taýyp, 28 kenshi jaraqat alǵan edi. Bul eki birdeı eskertkish – solardyń rýhyna jasalǵan taǵzym.
Qaraǵandy oblysy