Almatyda jańa Salyq jáne Bıýdjet kodeksteriniń negizgi máseleleri jáne olardy iske asyrý joldaryn talqylaýǵa arnalǵan kezdesý boldy. Sharaǵa Qazaqstan Respýblıkasy Parlamenti Senatynyń depýtattary Sultanbek Mákejanov pen Nýrııa Nııazova, qarjy jáne ulttyq ekonomıka mınıstrlikteriniń ókilderi, Almaty qalalyq máslıhatynyń depýtattary, ákimdik ókilderi, jurtshylyq jáne «Atameken» ulttyq kásipkerler palatasynyń músheleri qatysty.
Shara jańa zańnamalyq bastamalar boıynsha jan-jaqty taldaý men pikir almasýǵa arnaldy. Talqylaý aıasynda tanystyrylymdar bolyp, pikirtalastar óristedi. Olardyń barysynda problemalardy jarııa etýge jáne olardyń sheshimderin usynýǵa múmkindik berildi.
Senator Nýrııa Nııazova barlyq múddeli taraptardyń problemalardy oıdaǵydaı sheshý úshin birlesip jumys isteýiniń mańyzdylyǵyn atap ótti jáne jańa kodeksterdi iske asyrý kásipkerlik qyzmet pen ınvestısııa tartý úshin qolaıly jaǵdaı jasaıtynyna senim bildirdi.
«Jańa Salyq jáne Bıýdjet kodeksteri elimizdegi ekonomıkalyq jaǵdaıdy jaqsartýǵa baǵyttalǵan. Biz olardy tıimdi engizýge tıispiz jáne keıinnen baqylaý úshin kúsh biriktirýimiz kerek. Jańa qujattar Qazaqstanda ornyqty ósý men turaqtylyq úshin negiz bolady dep kútilýde», dedi senator N.Nııazova.
Kezdesý qorytyndysy boıynsha jańa Salyq jáne Bıýdjet kodeksterin engizý jáne iske asyrýǵa baǵyttalǵan usynymdar men budan bylaıǵy is-qımyl jospary ázirlendi. Senatorlar memlekettik organdar, bıznes jáne jurtshylyq arasyndaǵy dıalog pen ózara is-qımyldy jalǵastyrýdyń mańyzdylyǵyn atap ótti.