Senat Tóraǵasynyń orynbasary Olga Perepechına men senator Ásem Rahmetova Soltústik Qazaqstan oblysyndaǵy Taıynsha aýdanynyń turǵyndarymen, sondaı-aq óńirdegi jetekshi kásiporyndardyń ókilderimen kezdesti, dep habarlaıdy Egemen.kz.
Senattyń baspasóz qyzmetiniń málimetinshe, Kellerovka aýylynda ótken kezdesýde Olga Perepechına AES qurylysy elimizdiń energetıkalyq táýelsizdigi men turaqty ekonomıkalyq damýdy qamtamasyz etýge baǵyttalǵan strategııalyq mańyzdy qadam ekenin atap ótti.
«Atom elektr stansııasynyń qurylysy tek energetıkalyq qaýipsizdik qana emes, Qazaqstannyń bolashaǵyna arnalǵan uzaq merzimdi ınvestısııa. Atom energııasy álemdegi eń taza jáne senimdi energııa kóziniń biri bolyp tabylady. Bul qazba resýrstaryna táýeldilikten arylý jáne kómirtegi shyǵaryndysyn aıtarlyqtaı azaıtý múmkindigi bolyp tabylady. Azamattardyń el bolashaǵy týraly sheshim qabyldaýǵa belsendi qatysýy asa mańyzdy. Sondyqtan bul másele boıynsha aldaǵy respýblıkalyq referendýmnyń erekshe máni bar», dedi Olga Valentınovna.
Senator Ásem Rahmetova osyndaı jobalar joǵary jaýapkershilikti jáne halyqaralyq qaýipsizdik standarttaryna tolyq sáıkestikti talap etetinin atap ótti.
«Kóptegen azamattardyń atom elektr stansııasynyń qurylysyna qatysty suraqtary bar ekenin jáne osy másele tolǵandyryp otyrǵanyn túsinemiz. Bizdiń mindetimiz jobany talqylaý men iske asyrýdyń barlyq kezeńderinde barynsha ashyqtyqty qamtamasyz etý bolyp tabylady», dedi Ásem Rahmetova.
Depýtattar «BioOperations» JShS jáne «EMC Agro» JShS óńdeýshi kásiporyndarynda jáne Taıynsha elevatorynda da bolyp, agroónerkásiptiń oblys ekonomıkasy úshin mańyzdylyǵyn talqylady. Olga Perepechına kezdesýdi qorytyndylaı kelip, AES qurylysy sııaqty iri jobalarǵa qatysty sheshimder eldiń bolashaǵyna tikeleı áser etetindigi jáne ol búkil qoǵamnyń qatysýymen qabyldanýy kerektigin atap ótti.