Qyzmet babynda júrip qaza tapqan qaraǵandylyq qutqarýshy Haırat Halı Prezıdent Jarlyǵymen «Erligi úshin» medalimen marapattaldy. Mártebeli marapatty oblys ákimi Ermaǵanbet Bólekpaev qaza tapqan órt sóndirýshiniń týǵan-týystaryna tabys etti.
Qarqaraly aýdanyndaǵy dala órtin sóndirý kezinde Saran qalasyndaǵy №24 órt sóndirý bóliminiń aǵa órt sóndirýshi-qutqarýshysy Haırat qaza bolǵan edi. 1991 jyly týǵan serjant azamattyq qorǵaý organynda 2014 jyldan bastap jumys istep kelgen.
«Haırat Halıdyń órtti sóndirý kezinde kórsetken erligi – naǵyz batyldyq pen janqııarlyqtyń úlgisi. Ol óz ómirin adamdarǵa qyzmet etýge jáne týǵan jerin qorǵaýǵa arnady. Halıdyń jaqyndarynyń qaıǵylaryna ortaqpyz. Álbette, bizdiń sózimiz ben qoldaýymyz otbasyna ardaqty uldy, aıaýly ákeni qaıtara almaıdy. Tilsiz jaýmen kúres kezinde tabandy qyzmet qylyp, qyrshyn ketken batyrdyń esimi eshqashan umytylmaıdy», dedi Ermaǵanbet Qabdýlauly.
Memlekettik nagradany tabys etý rásimine qutqarýshynyń áriptesteri qatysty.
– El Prezıdentine bizdiń batyr áriptesimizdi marapattaǵany úshin alǵys aıtamyz. Halı Haırat óziniń onjyldyq qyzmeti barysynda qashanda mamandyqqa adaldyǵyn kórsetti. Onyń júrektiliginiń arqasynda birneshe jan qaterden arashalanyp qaldy, – dedi oblystyq Tótenshe jaǵdaılar departamentiniń bastyǵy Marǵulan Amanbaev.
Saran qalasyndaǵy órt sóndirý bóliminiń bastyǵy Marǵulan Ysqaqov Haırat qaza tapqan qaıǵyly oqıǵanyń qalaı órbigeni týraly baıandady. Haırat pen taǵy úsh qutqarýshy sol kúni dala aýmaǵyn kúzetýge shyǵady. Dalada órt oshaǵyn keziktirgen olar ony dereý sóndirýge kirisedi. Boljam boıynsha, sol sátte jeldiń baǵyty ózgergen.
– Jigitter oqıǵa ornyna jetip, bizge ne bolyp jatqanyn habarlap otyrdy. Haırattyń sońǵy aıtqan sózi: «Bári durys, ýaıymdamańyzdar» edi... Biraq tosyn tabıǵattyń kesirinen esil er qyzmettik mindetin atqarý barysynda qapııada mert boldy, – dedi M.Ysqaqov.
Marqumnyń jaqyndary «qaıǵyly sátte qasymyzdan tabylyp, esimin qurmettep, «Erligi úshin» medalin tartý etip jatqandaryńyzǵa erekshe alǵysymyzdy bildiremiz», dedi.
«Otbasynda tórt balanyń ekinshisi edi. Bala kúninen qutqarýshy bolýdy maqsat tutty, adamdarǵa kómektesip, qoǵamǵa paıdasyn tıgizgendi jaqsy kóretin. О́rt sóndirý bóliminde 10 jylǵa jýyq jumys istedi. Onyń erligi – ómirdegi qalǵan izi», deıdi marqumnyń ápkesi Bıbigúl Hamıtqyzy.
Qaraǵandy oblysy