Jetisýda Balqash kóline deıingi 132 shaqyrym joldyń qurylysy keler jylǵy týrıstik merzimge deıin aıaqtalady. Saryózekten Qorǵasqa deıingi jolda aýqymdy jóndeý júrgizilip jatyr. Bıyl aýdandyq jáne qalalyq ishki joldardy jóndeýge 14 mlrd teńge bólingen. «Aýyl – el besigi» baǵdarlamasy aıasynda 43,3 shaqyrym jol jóndelmek.
Oblys ákimdigi baspasóz qyzmetiniń málimetinshe, Lepsi aýylynan Balqash kóliniń jaǵalaýyna deıingi 27 shaqyrym avtokólik jolynyń qaıta jańǵyrtý jumysy aıaqtalyp, qoldanysqa berilgen. Molaly – Lepsi – Aqtoǵaı ýchaskesindegi 105 shaqyrymda qurylys júrip jatyr.
«Qazir qurylysqa 90-ǵa jýyq arnaıy tehnıka jumyldyrylǵan. Asfalt jamylǵysyn salý, jer tósemi, asfalt daıyndaý, untaqtaý, materıaldardy óńdeý, tasymaldaý jumystarynda 130-ǵa jýyq adam jumys istep jatyr. Joba iske asyrylǵanǵa deıin osy jolmen qatynaıtyn jol kólikteriniń aǵyny táýligine 3 myń avtokólik bolsa, qaıta jańǵyrtýdan keıin bul kórsetkish 6 myńǵa joǵarylap otyr», deıdi oblystyq Jolaýshylar kóligi jáne avtomobıl joldary basqarmasy basshysynyń orynbasary Aıdos Dosjanov.
Qurylys qunynyń qymbattaýyna baılanysty oblystyq bıýdjetten qosymsha 15,9 mlrd teńge qarjy bólingen. Balqash kóline deıingi jol qurylysy jobasynyń jalpy quny – 30,4 mlrd teńge.
Oblys aýmaǵynda respýblıkalyq mańyzy bar iri jobalar da iske asyp jatyr. Úsharal – Dostyq joly jáne Taldyqorǵan – Úsharal avtojolyn jóndeý 95%-ǵa oryndaldy. Nysan 2024 jyldyń sońynda aıaqtalady. Sondaı-aq Saryózek-Kóktal, Jarkent-Qorǵas avtojoldary jóndelip jatyr.
«QazAvtoJol» UK» AQ Jetisý oblystyq fılıaly dırektorynyń orynbasary Jasulan Qaltaevtyń aıtýynsha, ótken jyly Saryózek – Kóktal jáne Kóktal – Jarkent avtojolynyń jalpy uzyndyǵy 81 shaqyrymdyq ýchaskelerine kúrdeli jáne ortasha jóndeý júrgizilgen.
«Jetisý oblysynda jol qurylysynyń aýqymy artyp keledi. Bul ınfraqurylymdyq jumystar óńirdiń tranzıttik-logıstıkalyq áleýetin odan ári damytady. Jýyq arada Saryózek pen Kóktal, sondaı-aq Aıdarly men Kóktal eldi mekenderi arasyndaǵy joldyń birneshe ýchaskesinde kúrdeli jáne ortasha jóndeýdi jalǵastyrý josparlanyp otyr», deıdi J.Qaltaev.
Aımaqta 54 eldi mekenniń ishki joly jóndelip jatyr. «Aýyl – el besigi» baǵdarlamasy aıasynda jalpy uzyndyǵy 2 shaqyrym bolatyn 5 kóshede qyzý áreket baıqalady.
Jalpy, Jetisý oblysynda bıyl jergilikti mańyzy bar avtomobıl joldaryn damytý úshin 38,0 mlrd teńge bólingen, sonyń ishinde oblystyq mańyzy bar joldardy jóndeýge – 24,0 mlrd teńge, aýdandyq jáne qalalyq ishki joldardy jóndeýge 14,0 mlrd teńge qarastyryldy. Bólingen qarajat esebinen jergilikti mańyzy bar joldardyń 335,7 shaqyrymyna qaıta jańǵyrtý, kúrdeli jáne ortasha jóndeý jumystary júrgizilip jatyr.
Jetisý oblysy