Atyraýda «Asyl-Agro» sharýa qojalyǵynyń mal soıý sehynda ólgen maldan sibir jarasy anyqtalǵannan keıin karantın engizildi. Aýrý juqtyrǵan malǵa qatysy bolǵan 17 adam anyqtaldy. Solardyń birinde dene qyzýy kóterilip, ol aýrýhanaǵa jatqyzylǵan, dep habarlaıdy Egemen.kz AtyrauPress-ke silteme jasap.
Sibir jarasynan ólgen sıyrǵa qatysy bolǵan 17 turǵyn karantınge alyndy. Olardyń biri 22 qarashada tańerteń dene qyzýynyń 37,5-ke kóterilýine baılanysty oblystyq №2 aýrýhanaǵa jetkizildi.
Basylym málimetinshe, oblystyq Densaýlyq saqtaý basqarmasy basshysynyń mindetin atqarýshy Álmıra Sabyrǵalıevanyń aıtýynsha, 20 qarashada 17 adam baqylaýǵa alynǵan.
- Olardyń taldaý nátıjeleri áli daıyn emes. Qyzýy kóterilgen naýqastyń jaǵdaıy qanaǵattanarlyq. Tekserý úshin synamalar alyndy, nátıjeleri erteń daıyn bolady. Sibir jarasy adamnan adamǵa juqpaıdy, - dep sendirdi Densaýlyq saqtaý basqarmasynyń ókili.
Veterınarlyq zerthana jınalǵan materıaldarǵa zertteý júrgizgen. Bakterıologııalyq zertteýlerdiń nátıjeleri jaqyn arada belgili bolady.
Infeksııanyń taralýyn boldyrmaý maqsatynda Aqtóbeden epızootıkalyq top kelip, bazarlarda dezınfeksııa jumystaryn júrgize bastaǵany aıtyldy.