Qaraǵandy oblysynda esirtki jáne psıhotroptyq zattardy óndirý jáne satýmen aınalysqan uıymdasqan qylmystyq topqa qatysty sotqa deıingi tergeý amaldary júrgizilip jatyr, dep habarlaıdy Egemen.kz tilshisi oblystyq polısııa departamentiniń baspasóz qyzmetine silteme jasap.
Esirtki qylmysyna qarsy kúres bóliminiń qyzmetkerleri júrgizgen jedel-izdestirý is-sharalary aıasynda Asyl aýylynda esirtki zerthanasy joıyldy. Oqıǵa ornynan 200 kelige jýyq esirtki zattary men olardy jasaýǵa arnalǵan qural-jabdyqtar tabyldy. Operasııa barysynda erli-zaıyptylar – Almaty qalasynyń týmasy 25 jastaǵy er adam men 29 jastaǵy áıel ustaldy.
Odan ári júrgizilgen is-sharalar nátıjesinde Almatyda 30 jastaǵy esirtki zerthanalary jelisin uıymdastyrýshy Temirtaý qalasynyń týmasy ustaldy. Kúdiktiden qylmystyq jeli qyzmetin úılestirý úshin paıdalanylǵan noýtbýk, tarazy, kúndelik jáne 21 uıaly telefon sııaqty aıǵaq zattar alyndy.
Tergeý nátıjesinde ustalǵan azamattyń Qaraǵandy jáne Almaty oblystarynda ornalasqan bes esirtki zerthanasyn uıymdastyrýǵa qatysy bar ekeni anyqtaldy.
- Qylmystyq áreketke qatysy bar barlyǵy bes adam ustaldy. Uıymdasqan qylmystyq toptyń barlyq múshelerin anyqtaý jáne olardyń zańsyz áreketterin toqtatý boıynsha jedel-izdestirý sharalary jalǵasyp jatyr, - delingen habarlamada.