Shet aýdandyq arheologııalyq-etnografııalyq mýzeıiniń qory jańa jádigermen tolyqty. Onda aqyn, ánshi, kompozıtor Mádı Bápıulynyń er-toqymyn qusbegi Tileýqabyl Esenbekuly tabystady.
Er-toqymnyń bul túri Arqa dalasynda keń taralǵan. Erdiń el aýzyndaǵy ataýy – úırekbas er nemese arǵyn er. Bul jádigerdiń bas pishini kóbine úırek erge kelińkireıdi. Bir qaraǵanda sulbasy sýda júzgen úırek sekildi. Kóbine sal-seriler qoldanǵan kórinedi.
– Qaz daýysty Qazybek bıdiń urpaǵy, halyq aqyny, ánshi-kompozıtor, segiz qyrly, bir syrly, óz zamanynda óleń-jyrlary, jyr-shýmaqtary qaǵaz betine túspese de el aýzynda saqtalǵan darqan dalanyń dúldúli Mádı Bápıulynyń er-toqymyn mýzeı qoryna tabystaý kópten oıymda júr edi. Degenmen tarıhı jádigerdiń úıdiń tórinde turǵany da erekshe áserli. Alaıda menen keıin kim ıe bolyp qalatynyn oılap, osy sheshimdi jón kórdim. Maǵan deıin qoldan-qolǵa ótip kelgen jádiger ǵoı. Qundy dúnıeniń qolyma túsýiniń de tarıhy tereńde, – deıdi saıatshy, ólketanýshy Tileýqabyl Esenbekuly.
Jádiger búrkitshiniń qolyna qalaı túsken degen suraq týýy zańdy. Mádıdiń jol serigi, atqosshysy bolǵan Toqash Kádikeev ánshiniń qaryndasy Máprýzaǵa úılengen. Mádı atylyp ketkennen keıin er-turmany kúıeýbalasy Toqash Kádikeevte qalǵan. Toqashtan balasy Lıataıǵa berilgen. Lıataıdan shahtada birge jumys istegen Aıǵoja týysyna kóshedi. Aıǵojadan jaqyn týysy Nyǵmetollanyń qolyna túsedi. Al Nyǵmetolla – Tileýqabyldyń naǵashysy. Bul er-toqymdy bul kisi qalpyna keltirip, 30 jyl tutynypty.
Kóne er shamamen XX ǵasyrdyń basynda jasalǵan. Materıaly aǵashtan shabylyp, taza bylǵarymen qaptalyp, kúmispen kúptelip, bezendirilgen.
Qaraǵandy oblysy,
Shet aýdany