Prezıdent Qasym-Jomart Toqaev Úkimettiń keńeıtilgen otyrysynda ınfraqurylymdy damytý memlekettik saıasattyń mańyzdy basymdyqtarynyń biri ekenin atap ótkeni belgili. Osy mindetti iske asyrý aıasynda Jambyl oblysynda birqatar jumys atqarylmaq. Naqtyraq aıtsaq, óńir joldaryn jóndeýge qomaqty qarajat bólinip otyr, dep habarlaıdy Egemen.kz.
Oblystyq jolaýshylar kóligi jáne avtomobıl joldary basqarmasynyń basshysy Murat Saýryqovtyń aıtýynsha, 2024 jyly 16,5 shaqyrym jol salynyp, 1 kópirdiń qurylysy júrgizildi. 3 shaqyrym jol qaıta jańǵyrtylyp, 690,4 shaqyrym jol orta jóndeýmen qamtyldy.
Bıyl óńirdegi jergilikti mańyzy bar avtojoldar men eldi meken kóshelerin jóndeýge 23,6 mlrd. teńge bólindi. Bul qarjyǵa 146 jol jóndeý jobasy júzege asyrylady. Atap aıtqanda, 17,7 shaqyrym jańa jol salynady, 8 shaqyrym jol qaıta jańǵyrtylady, 391,4 shaqyrym jol orta jóndeýden ótedi.
Jol qozǵalysyn qamtamasyz etý maqsatynda bólingen qarjynyń 3,4 mlrd. teńgesi jergilikti joldar men eldi meken kóshelerin aǵymdaǵy jóndeý men kútip ustaý jumystaryna baǵyttalady.
Bıylǵy jyldyń qorytyndysy boıynsha jaqsy jáne qanaǵattanarlyq jaǵdaıdaǵy jergilikti mańyzy bar avtojoldardyń úlesin 99,5 paıyzǵa (2024 j. - 99%), eldi meken kósheleri boıynsha bul kórsetkishti 89 paıyzǵa (2024 j. - 87%) jetkizý mejelenip otyr.