Metallýrgter qalasy Temirtaýda iri kompanııalar men shaǵyn jáne orta bıznesti biriktiretin elimizdegi eń alǵashqy ónerkásiptik klaster qurylady. Bul týraly «Qarmet» kreatıvti tehnologııalar ortalyǵynda ótken «О́nerkásiptik klasterdi jáne el ishindegi qundylyqtardy damytý» atty bıznes-forýmda málim boldy.
«Qaraǵandy óńiri – elimizdiń ındýstrıaldy júregi. О́ńdeý ónerkásibiniń kólemi boıynsha kóshbasshy oryndamyz. О́tken jyly oblys 3 trln teńgeden astam ónim shyǵardy. Biz bıznestiń ósýine jáne ınvestısııa tartýǵa jaǵdaı jasap jatyrmyz. Bıyl 1,5 trln teńgeden astam ınvestısııa tartýdy josparlap otyrmyz, onyń 90 paıyzǵa jýyǵy – jekemenshik ınvestısııa. «Qarmet» kompanııasymen birge metallýrgııalyq klasterdi damytýǵa, sonyń ishinde qaldyqtardy qaıta óńdeýge erekshe nazar aýdaryp otyrmyz. Kompanııamen birge máselelerdi jedel sheshý úshin jobalyq keńse qurylady. Bizdiń basty baılyǵymyz – adamdar. «Jumysshy mamandyqtary jyly» aıasynda biz jańa salalar úshin kadrlardy belsendi daıarlap jatyrmyz. Qaraǵandy tehnıkalyq ýnıversıtetiniń bazasynda óńirlik ınnovasııalyq-ındýstrııalyq hab qurylady», dedi aımaq basshysy Ermaǵanbet Bólekpaev.
Eger ónerkásiptik klaster órkendese, óndiris kólemi ǵana ósip qoımaıdy. Sáıkesinshe sıfrlyq sheshimderdi engizý men bıznestiń memlekettik organdarmen ózara is-qımyly ońtaılanady.
«Bul forým – «Qarmet» iri kásipornynyń aınalasynda shaǵyn jáne orta bıznesti damytýǵa baǵyttalǵan mańyzdy qadam. Mınıstrlik iri kompanııalardyń jergilikti jetkizýshilerimen ózara seriktestik boıynsha belsendi jumys júrgizip jatyr. Biz bul ónerkásiptiń turaqty ósýiniń kepili ekenine senimdimiz», dedi О́nerkásip jáne qurylys vıse-mınıstri Iran Sharhan.
Májilis depýtaty Arman Qalyqov «Qarmet» elimizdiń 17 serpindi jobasynyń qataryna kirgenine qýanyshty ekenin jetkizdi.
«Bul sózsiz, kásiporynnyń el óndirisindegi mańyzdy rólin aıqyndaıdy. Biz jumysshylar men kásiporyndar múddesin qorǵaýdy odan ári jalǵastyramyz», dedi A.Qalyqov.
Búginde oblystaǵy qyryqqa jýyq shaǵyn jáne orta bıznes kásiporyndary «Qarmet» kompanııasymen ózara seriktestik ornatyp otyr. Forýmda Qaraǵandy oblysynyń ákimdigi men «Qarmet» AQ arasynda el ishindegi qundylyqtardy damytý boıynsha memorandýmǵa qol qoıyldy. Mańyzdy qujat iri óndiris oshaǵy men óńirimizdegi shaǵyn jáne orta bıznestiń arasyndaǵy yntymaqty odan ári jarastyrýǵa kepil. Munymen qosa «Qarmet» kompanııasy óndiristik qurylymdary ornalasqan basqa da qalalarda shaǵyn ónerkásiptik aımaqtar qurýdy josparlap otyr. Bul da óz kezeginde jergilikti óndiristik áleýetti arttyrady.
Oblys ákimdigi «Qarmet» kompanııasymen birlesip, bastama aıasynda 20 myń sharshy metr daıyn úı-jaıǵa arnalǵan shaǵyn ónerkásiptik aımaq qurady. Jańa jumys oryndary ashylady. О́ndiristik tizbekter nyǵaıtylyp, ımportqa táýeldilik qysqarady. Sonymen qatar joba aıasynda iri bıznes pen shaǵyn kásipkerlik ıntegrasııasy júzege asyp, sıfrlyq sheshimder engizilmek.
«Metallýrgııany jáne sabaqtas salalardy damytý, otandyq óndirýshilerdiń álemdik naryqtaǵy ustanymyn nyǵaıtý, elishilik qundylyqty qurý – elimizdiń uzaqmerzimdi ornyqty damýynyń negizgi faktorlary. Byltyr kúrdeli syrtqy ekonomıkalyq jaǵdaılarǵa qaramastan, «Qarmet» bolat óndirisin 15 paıyzǵa, ıaǵnı 3,5 mln tonnaǵa deıin ulǵaıtty. Bul ósim elimizge bolat óndirý qarqyny boıynsha álemde 8-orynǵa turaqtaýǵa múmkindik berdi. 2028 jylǵa qaraı bolat óndirisin jylyna 5 mln tonnaǵa jetkizý maqsatyn qoıyp otyrmyz. Bul baǵdar óndiristi aýqymdy jańǵyrtýǵa, shyǵyndardy ońtaılandyrýǵa, úderisterdi sıfrlandyrýǵa jáne kásiporyn aınalasyndaǵy ónerkásiptik klasterdi damytýǵa negizdelgen», dedi «Qarmet» kompanııasynyń bas dırektory Vadım Basın.
Qaraǵandy oblysy