Birikken Ulttar Uıymynyń mereıli jyly aıasynda yqpaldy qurylymnyń júrip ótken jolyna sholý jasap, aldaǵy bolashaǵyn saralaýǵa baǵyttalǵan aýqymdy is-sharalar bastalyp ketti. Sonyń biri – Almatyda ótken «Beıbitshilik pen jasampazdyq jolyndaǵy yntymaqtastyq: Qazaqstannyń BUU-nyń quramyna kirýiniń 33 jyldyǵy jáne BUU-nyń 80 jyldyǵy» atty ǵylymı-praktıkalyq konferensııa.
Syrtqy ister mınıstrliginiń uıytqy bolýymen ótken is-sharaǵa uıymǵa múshe memleketterdiń Qazaqstandaǵy ókilderi men saıası sarapshylar qatysty. Beıbitshilik pen qaýipsizdikti qamtamasyz etý, adam quqyqtary men turaqty damýdy ilgeriletý baǵytynda 1945 jyly qurylǵan uıym 80 jyl ishinde jahandyq yntymaqtastyqtyń áleýetin arttyrýǵa aýqymdy úles qosyp keledi. Elimizdiń 1992 jyly BUU-nyń quramyna kirýi halyqaralyq qatynastar tarıhynyń mańyzdy kezeńi ári táýelsiz jas memlekettiń kúrdeli jahandyq máseleler men syn-qaterlerdi sheshý maqsatynda halyqaralyq qoǵamdastyqpen beıbitshilikke, qaýipsizdikke jáne jemisti yntymaqtastyqqa umtylysynyń kórinisi ekenin aıtqan Almaty qalasyndaǵy SIM ókildiginiń basshysy Jánibek Ábdirashov osy jyldar ishindegi aıtýly tabystarǵa toqtalyp ótti.
«Biz osy mereıtoı aıasynda Qazaqstannyń BUU múshesi bolyp qabyldanǵanyna 33 jyl tolýyn atap ótemiz. Osy jyldar ishinde halyqaralyq jáne jahandyq qaýipsizdikti qamtamasyz etýge naqty úles qosa otyryp, Qazaqstan BUU Jarǵysynyń maqsattary men qaǵıdattaryn berik ustanady jáne jaýapty seriktes bolyp keledi. Ortaq tarıhqa kóz júgirtsek, Qazaqstan beıbitshilik pen turaqtylyqty ilgeriletýdegi kóshbasshylyǵyn dáıekti túrde kórsetip jatyr», dedi J.Ábdirashov.
Ádildik, soǵyssyz beıbit álem ıdeıasyn ustaný, adam quqyǵyn qorǵaý, densaýlyq saqtaý men tabıǵatty aıalaý, ǵalamdyq qıyndyqtardy birlese eńserý uıymnyń basym baǵyty ekenin aıtqan Qytaı halyq respýblıkasynyń Bas konsýly Szıan Veı Qazaqstan men Qytaı arasyndaǵy dıplomatııalyq baılanystyń órken jaıýyna BUU-nyń yqpaly zor dep málimdedi.
«BUU Ekinshi dúnıejúzilik soǵystan keıin quryldy. Adamzat qanquıly qasiretten sabaq alýǵa tıis edi. Alǵashqy qujaty 1944 jyldyń tamyz aıynda qabyldanǵan ortaq halyqaralyq uıym jahandyq máselelerdi birlese sheshý úshin aýadaı qajet edi. Osy jyldar ishinde Qazaqstan uıymnyń barlyq is-sharasyna belsendi qatysyp keledi. Qytaı men Qazaqstan uıymnyń belsendi múshesi retinde ár kez beıbitshilikti qoldaıdy. Qazaqstan ıadrolyq qarýdan óz erkimen bas tartyp, álemge jaqsy úlgi kórsetti. Terrorızmmen kúres baǵytyndaǵy bastamalaryńyzdy da qoldaımyn. Keıingi 20 jyldyqta adamzat balasy túrli qaýip-qaterlermen betpe-bet kelip otyr. BUU jan-jaqty qarym-qatynastardyń alańy retinde bedelin arttyra berýge tıis», deıdi konsýl.
Konferensııada Qazaqstannyń saıası arenadaǵy bedeli, syrt memlekettermen dıplomatııalyq qarym-qatynasy keńinen talqylandy. BUU-ǵa múshe bolýdyń mańyzy jóninde Qazaqstannyń BUU-daǵy tuńǵysh turaqty ókili ári el tarıhyndaǵy alǵashqy áıel-elshi Aqmaral Arystanbekova baıandama jasady.
«Álem damýynyń qazirgi zamanǵy betalystary, qalyptasyp otyrǵan halyqaralyq-saıası ahýal jahandaný jaǵdaıynda jahandyq problemalardy dúnıejúzilik qoǵamdastyqtyń ortaq múddeleri negizinde sheshýge jańasha turǵydan qaraýdy qajet etedi. Beıbitshilik pen qaýipsizdikti saqtaýda kópjaqty dıplomatııanyń róli, memleketterdiń kópjaqty saıası jáne qarjy-ekonomıka ınstıtýttarynyń qyzmetine, ıntegrasııalyq úderister men óńirlik yntymaqtastyqqa belsene qatysýynyń qajettigi arta túsedi. Qazaqstan 33 jyl ishinde BUU minberinen óz oıyn erkin aıtyp keledi», dedi A.Arystanbekova.
Basqosýda budan ózge ǵalamdyq jylyný úderisiniń ózekti máseleleri, sıfrlyq saýatty damytý, ınnovasııalar men kásipkerlikti qoldaý, sandyq transformasııada kúsh-jiger biriktirý sekildi ózekti taqyryptar talqylandy.
ALMATY