Eńbek etýge nıetti janǵa taǵdyr da tosqaýyl bola almaıdy. Aıtalyq, kásipker Serik Jumabekov qos janary kórmese de, júırik baptap, et pen sút óndirisine úles qosyp keledi. Kelinshegimen birlesip atakásipti qolǵa alǵan zaǵıp jannyń tirligi – kópke úlgi.
Kózben kórgen adam qaıyrylmaı ketpesi anyq. Taǵdyrdyń basqa salǵanyna kónip, tórt qabyrǵaǵa qamalyp otyra berýge de bolar edi. Alaıda bolmysyndaǵy erik-jiger men qanda bar qasıeti múmkindigi shekteýli jandy tyǵyryqtan alyp shyqty. Eskeldi aýdanyna qarasty Abaı aýylynyń turǵyny Serik Jumabekov jylqy baǵýdy súıikti isim dep sanaıdy. Qambar ata túligin bala jasynan jaqsy kórgen ol búginde etti, sútti baǵyttaǵy mal basyn kóbeıtip, tuqymyn asyldandyrýdy kózdep otyr.
«Kópbalaly otbasynda dúnıege keldim. 2010 jyldan bastap birinshi toptaǵy múmkindigi shekteýli janmyn. Bala kezden jylqy malyn jaqsy kóremin. Bir kúni attan qulaǵanym bar. Jas bolǵandyqtan ba, jyǵylǵan sátte densaýlyǵyma zaqym kelgenin ańǵarmappyn. Kóz janarymnyń zaqymdanǵanyn keıin bildim. Biraq bári kesh boldy. Osylaısha, kórý qabiletinen aıyryldym. Densaýlyǵyma baılanysty birazǵa deıin jumyssyz júrdim. Dese de alda maqsat turdy. Tehnıkanyń damyǵan zamany ǵoı. О́zimdi jetildirýdi oılap, tıflotehnıkalyq qural qoldanýdy úırendim. Bul maǵan úlken kómek boldy. Jumysqa arnaıy kólikpen aparyp, ákeledi. Bir sózben aıtqanda, alańsyz eńbek etýge kerekti jaǵdaıdyń bári jasalǵan, ýaqtyly eńbekaqy alamyz», deıdi keıipkerimiz.
Eń bastysy, zaǵıp jan «densaýlyǵym jaramaıdy, qolymnan is kelmeıdi» dep tórt qabyrǵada qamalyp, kópten kómek surap otyrǵan joq. Kerisinshe, múmkindiginiń shekteýliligine qaramastan, qoǵammen, on eki múshesi saý adamdarmen teń qarym-qatynas jasaıdy. Sóıtip, ózi sekildi talaı janǵa bar bilgenin úıretip, órge súırep keledi. Jylqy baǵýmen birge Qarabulaq aýylyndaǵy aýdandyq kitaphanada byltyrdan beri zaǵıptar bóliminiń qyzmetkeri bolyp eńbek etedi.
Kitaphanada ótetin is-sharalardyń uıymdastyrylýyna muryndyq bolyp júrgen azamat eki jyl buryn oblys ákiminiń grantymen Qaskeleń mádenıet kolledjine oqýǵa túsip, kitaphana mamandyǵy boıynsha bilim aldy. Serik Sembekuly búginde múmkindigi shekteýli azamattardy qoǵamǵa tartyp, jumys isteýge baýlý, bilimin jetildirip, eńbekke aralastyrý, tyǵyryqtan shyǵý joldaryn kórsetip, jón silteýdi mindetim dep biledi. Aıtýynsha, Eskeldi aýdanynda 60 shaqty múmkindigi shekteýli jan bar, solardyń basym bóligi osy kitaphanadaǵy is-sharalarǵa qatysyp turady.
Baıqaǵanymyzdaı, atalǵan ǵımarattyń bir buryshynan oryn tepken qyzmet ornynda jumys isteýine qajettiniń bári tur. Ústel ústinde tıflofleshpleer, oqyp, jazatyn kómek quraldary, basqa da zattary tur. Osy arqyly kitap oqyp, bilimin shyńdaıdy, izdenedi. О́zi sekildi azamattarǵa kómektesip, alǵa jeteleıdi. Kitaphanadan tys ýaqytta Qambarata túligin baǵady. Jylqy sharýashylyǵymen aınalysýǵa kelinshegi Aqmaral Ábdilbekqyzy kómektesedi. Ol maldy azyqtandyryp, sýarýda, jylqy, sıyr saýyp, sút, qymyz alýda, qurt-irimshik jasap, satýda esh qınalmaıtynyn aıtty.
«Qazir onshaqty bas bar. Ekeýi asyl tuqymdy. Taıaýda Reseı elinen arab jylqysyn ákeldik. Jaqynda qulyndaıdy. Jyl saıyn tólin satyp, odan túsken qarajatqa mal azyǵyn alamyz. Bir qyzyǵy, jylqylarym kózimniń kórmeıtinin sezetin sekildi. О́ıtkeni olardy azyqtandyratyn sátte maǵan ózderiniń qaı jaqta turǵany týraly belgi beredi. Sol jaqqa qaraı betteımin. Jaz kezderi de solaı. Olardy jaıylymnan alyp qaıtqanda esh jerge burylmastan úıge qaraı jol tartady. Men sońdarynan erip otyramyn. Iаǵnı bir-birimizdiń aramyzda kórinbeıtin baılanys bar. Aldaǵy kezde báıgege qatysý oıda bar», deıdi Serik.
Serik Sembekuly sóz sońynda qıyn sátte jol kórsetken ustazy Qýanysh Qapanov atty azamatqa erekshe alǵysyn bildirdi. Seriktiń jumyssyz qalǵan kezinde aqyl-keńesin aıtyp, tıflotehnıkalyq qural qoldanýdy úırenýine kóp kómegin tıgizipti. Nátıjesinde, qurylǵyny qalaı paıdalaný keregin meńgerip alǵan ol búginde jemisin kórip otyr.
Jetisý oblysy