Tarazda jyldar boıy jyr bolǵan jańa kópirdiń qurylysy bastaldy. Abaı dańǵyly men temir joldyń arǵy betindegi halyqty baılanystyratyn kópirdiń irgetasyn qalaý rásimine óńir basshysy Erbol Qarashókeev qatysty, dep habarlaıdy Egemen.kz.
Abaı dańǵylynyń boıyndaǵy temir joldyń ústinen ótetin kópir turǵyndar qaýipsizdigi úshin salynbaq. Oblys ákimdiginiń baspasóz qyzmeti taratqan derekke sensek, ótkeldiń jalpy uzyndyǵy 0,946 shaqyrymdy quraıdy. Bas merdiger «Qazaqdorstroı» JShS barlyq sapa standarttaryn saqtaı otyryp, ozyq ınjenerlik tehnologııalardy qoldanatyn bolady.
Nysan eki jedelsatymen jabdyqtalady. Sondaı-aq baǵdarsham ornatý, aýmaqty abattandyrý, jaryqtandyrý jumystary júrgiziledi. Jańa kópir qala ortalyǵyn temirjol jelisiniń arǵy bóliginde ornalasqan turǵyn úılermen baılanystyryp, qalanyń tranzıttik kólik qozǵalysyn jeńildetedi.
Aýqymdy ınfraqurylymdyq jobany júzege asyrý oblys ortalyǵyndaǵy logıstıkany jaqsartýǵa, kólik qozǵalysynyń tıimdiligin arttyrýǵa jáne kólik qaýipsizdigin qamtamasyz etýge múmkindik beredi.
«Memleket basshysy Qasym-Jomart Kemeluly Toqaev «Qýatty óńirler – qýatty el» qaǵıdasy árqashan ózekti ekenin atap ótti. Prezıdent tapsyrmasy boıynsha birqatar mańyzdy bastamalardy júzege asyrýdyń arqasynda óńirlerdi damytý úshin jańa múmkindikterge jol ashylyp jatyr.
Taraz aýmaǵy keńeıip, qalaǵa Baızaq jáne Jambyl aýdandarynan 14 eldi meken qosylyp, halyq sany 480 myń adamdy qurady, bul, árıne, kólik aǵynynyń artýyna áser etedi. Oblys ortalyǵynda Áýlıeata jáne Jibek joly ataýymen eki ákimshilik aýdan quryldy. Jańa kópir qos aýdan arasyndaǵy qosymsha baılanysty qamtasyz etip, aımaqta kólik-logıstıka salasynyń damýyna oń áser etedi», deıdi Erbol Qarashókeev.
Jambyl oblysy