Kúni keshe Jambyl oblysy, Merki aýdanyndaǵy «Nuraı» bóbekjaı baqshasynda bir top bala ýlanyp, túgeldeı aýrýhanaǵa túskeni týraly aqparat tarady. Búgin oblys ákimdiginiń baspasóz qyzmeti atalǵan oqıǵaǵa qatysty málimet taratty, dep habarlaıdy Egemen.kz.
«2025 jyldyń 17 naýryz kúni Merki aýdandyq ortalyq aýrýhanasynyń juqpaly aýrýlar bólimine Merki aýyly Oıtal ýchaskesi «Nuraı» bóbekjaı baqshasynyń 10 tárbıelenýshisi kelip túsken. Onyń ishinde 9 jaǵdaı jiti ishek ınfeksııasy, 1 jaǵdaı enterovırýsty ınfeksııa dıagnozymen tirkelgen. 1 jasóspirim jansaqtaý bólimine aýystyrylǵan, jaǵdaıy birqalypty (oń nátıjeler baıqalýda). Osyǵan baılanysty oblys ákimi Erbol Qarashókeevtiń tapsyrmasyna sáıkes jumysshy top qurylyp, ár balanyń jaǵdaıymen tanysyp, oryn alǵan jaǵdaı zerdelenýde. Aýrýdyń neden shyqqany anyqtalýda.
Qazirgi tańda aýrýhanada qosymsha tósek orny qajetilikke baılanysty daıyn. Dári-dármek qory jetkilikti. Búgingi kúnge Merki aýdandyq sanıtarııalyq-epıdemıologııalyq baqylaý basqarmasymen tekserý jumystary bastalyp, barlyq synamalar alynǵan, qorytyndysy kútilýde.
Atalǵan bóbekjaı jumysy zalalsyzdandyrý jumystaryn júrgizý úshin eki táýlikke toqtatylyp, ata analarǵa eskertildi», delingen oblys ákimdiginiń baspasóz qyzmeti taratqan aqparatta.
Resmı derekke sensek, qazirgi kezde quzyrly organ qyzmetkerleri arnaıy tekserý jumysyn júrgizip jatqan kórinedi. Nátıjesine sáıkes tıisti sheshim qabyldanbaq.