Taldyqorǵan qalasyna qarasty О́tenaı aýylynda dárigerlik ambýlatorııanyń qurylysy júrgizilip jatyr. Jol kartasy aıasynda qolǵa alynǵan mańyzdy áleýmettik nysannyń jumysy depýtattar men jergilikti bılik ókilderiniń baqylaýynda. Odan bólek, oblys ortalyǵynda tyń medısınalyq ádister tájirıbeden ótip, jergilikti mamandar sheteldik dárigerlerden dáris alady.
О́ńirde keıingi jyldary birneshe emhanaǵa jańǵyrtý jumystary júrgizildi. Keıbir shalǵaı aýyldar jańa medısınalyq nysanǵa qol jetkizdi. О́tenaılyqtar osy kúnge deıin irgetasy 1986 jyly qalanǵan eski ǵımaratta em qabyldap júrdi. Munda sapaly medısınalyq kómek alý, dárigerge qaralý, jatyp em qabyldaý jaǵy durys qarastyrylmaǵan. Sondyqtan okrýgtegi 17 myńnan asa halyqtyń teń jartysy qalalyq aýrýhanalarda tirkelgen. Jyldan jylǵa turǵyn sanynyń artýyna baılanysty aımaqqa dárigerlik ambýlatorııanyń qajettiligi týyndap otyr.
«Aýylymyzda zamanaýı ambýlatorııanyń ashylatynyna halyq dán rıza. Endi aýyl turǵyndary Taldyqorǵanǵa, qalalyq emhanalarǵa baryp áýre bolmaıdy. Qurylystyń 80%-y aıaqtaldy. Sapaly júrip jatqanyna jiti kóz jetkizip, nysan qoldanysqa berilgen kúnge deıin partııalyq baqylaýda ustaıtyn bolamyz», deıdi oblystyq máslıhattyń depýtaty Qaırat Kereev.
Bas merdiger «Jarkent alǵyr» JShS-men ótken jyly kelisimshart jasalǵan. Búginde qurylys alańynda 20-25 maman eńbek etip júr. Jospar boıynsha ambýlatorııa 2025 jyldyń mamyr aıynda paıdalanýǵa beriledi.
Jańa emhana О́tenaı aýylynan bólek, «Yntymaq», «Jastar-1», «Jastar-1/1», «Jastar-2» turǵyn úı alabynyń halqyna da qyzmet etpek. Aıta ketelik, óńirde aýyldyq jerlerdegi medısına qurylǵylaryn damytý jumystary da júrip jatyr. Oblystyq densaýlyq saqtaý basqarmasynyń ókilderi sheteldik áriptesterimen tyǵyz baılanys ornatqan. Ondaǵy maqsat – operasııa jasaýdyń jańa ádisterin úırený. Máselen, oblystyq onkologııalyq klınıka bazasynda Izraılden kelgen halyqaralyq mamandardyń qatysýymen HIPEC apparatymen operasııa jasaý jóninde sheberlik sabaǵy ótti. Dárigerlerdi HIPEC tásilimen emdeýdi úıretýge Izraılden «Haım Shıba» medısınalyq ortalyǵynyń hırýrgııa jáne hırýrgııalyq onkologııa bóliminiń aǵa hırýrgi, medısına ǵylymdarynyń doktory Almog Ben-Iаakov keldi. Sondaı-aq kompanııanyń ókili, ınjener Vıacheslav Ivanov ta operasııaǵa qatysty. Shetelden kelgen bilikti mamandardy emhana dárigerlerine klınıkanyń dırektory Madııar О́mirbaev tanystyrdy.
Tájirıbede onkologııa mamandary gıpertermııalyq ıntraperıtonealdi hımııalyq terapııa tehnologııasy arqyly sút bezi, asqazan, toq ishek obyryn aralas emdeýdiń jańa, joǵary tehnologııalyq ádisin kórsetti. Oblystyq onkologııalyq klınıka gıpertermııalyq ıntraperıtonealdi hımıoperfýzııa ádisin alǵash qoldanǵan óńirlik onkologııalyq ortalyq. Oblys ákimdigi men densaýlyq saqtaý basqarmasynyń qoldaýymen 2024 jyldyń qazan aıynda jańa medısınalyq jabdyq HIPEC apparaty satyp alynǵan edi. Gıpertermııalyq ıntraperıtonealdi hımıoterapııa – onkologııany emdeýdiń ınnovasııalyq ádisi. Ol barlyq isik oshaǵyn hırýrgııalyq tásilmen alyp tastap, ish qýysyna 42-43 °C deıin qyzdyrylǵan hımııalyq preparat engizedi. Ol perıtonealdi kanseromatozǵa (rak kletkalarynyń zaqymdanýy) qoldanylady. HIPEC paıda bolǵannan keıin operasııa jasaýǵa jatpaıdy dep sanalǵan qaterli isikti emdeý múmkin bolady.
Almog Ben-Iаakov jýrnalısterge bergen suhbatynda klınıkaǵa kelgende operasııa jasaýǵa múmkindik bar ma eken dep qobaljyǵanyn jasyrmady. Biraq qaterli isikke zamanaýı tásilmen operasııa jasaýǵa kiriskende barlyq qural-jabdyq, múmkindiktiń talapqa saı ekenin kórip qýanǵanyn, operasııanyń sátti jasalǵanyn aıtty.
«Bir úıdiń balasyndaı túsinistikte, yntymaqta, syılastyqta jumys isteıtin ujymda, ortada ǵana em nátıje beredi. Mınıstrlik, basqarma, klınıka bir-birin jarty sózden túsinisedi. Em jasaýǵa kelgende bilek sybana kirisedi. Barlyǵynyń maqsaty – obyrǵa shaldyqqan adamdarǵa kómektessek degen oı», deıdi A.Ben-Iаakov.
Halyqaralyq dárejedegi sheberlik saǵaty dárigerlerge úzilgen úmitti ushtaıtyn ádisti úıretti. Jańa tásil qaterli isikti emdeýge barynsha múmkindik týǵyzady degen senim bar.
Jetisý oblysy