Qazaqstan musylmandary dinı basqarmasy (QMDB) krıptovalıýta, sonyń ishinde bıtkoınniń sharıǵatqa qaıshy ekendigin málimdedi. Osyǵan oraı, musylmandarǵa krıptovalıýtamen aınalysýǵa tyıym salynǵany jóninde pátýa shyǵaryldy, dep habarlaıdy Egemen.kz.
QMDB-nyń habarlaýynsha, bıtkoın ulttyq valıýta retinde moıyndalmaıdy, sebebi ol memlekettik kepildikter men qarjylyq zańdarmen qorǵalmaǵan jáne naqty aktıvterge negizdelmegen ortalyqtandyrylmaǵan vırtýaldy aqsha bolyp eseptelinedi.
Krıptovalıýtanyń naryǵynyń turaqsyzdyǵy, onyń qunyndaǵy kúrt ózgerister adamdardyń qarjylyq shyǵyndarǵa ushyraýyna ákelýi múmkin. Bul, óz kezeginde, adamnyń mal-múlkin aram jolmen alý jáne onyń quqyqtaryn buzý qaterin týǵyzady. Sharıǵatta belgisizdik deńgeıi joǵary mámilelerge tyıym salynǵandyqtan, bıtkoınniń anonımdiligi men shıfrlaý júıeleri alaıaqtyq áreketterge jol ashatyny da QMDB tarapynan atap ótildi.
Sonymen qatar, bıtkoınnyń aınalymy ekonomıkalyq turaqtylyqqa teris áser etip, kóleńkeli bıznesti, aqshany jylystatýdy jáne tyıym salynǵan uıymdardy qarjylandyrýdy jeńildetýi múmkin dep paıymdalady. Osylaısha, QMDB sharıǵat turǵysynan bıtkoındi paıdalanýǵa qatań tyıym salynatynyn jarııalady.