Otandyq ǵalymdar Igor Ponomarev pen Nurlybek Úderbaev «Ulttyń ımmýndyq portreti» jobasy aıasynda jasandy ıntellekt kómegimen adamnyń ımmýnıtetin jalpy qan taldaýy boıynsha baǵalaıtyn ınnovasııalyq ImmuniGuide platformasyn ázirledi, dep habarlaıdy Egemen.kz.
Kádimgi qan taldaýy ımmýndyq júıeńizdiń jaǵdaıyn 99% dáldikpen anyqtaı alady. Ǵalymdardyń «Ulttyń ımmýndyq portreti» jobasy Qazaqstan halqynyń ımmýndyq júıesiniń jaı-kúıin tereń zertteýge baǵyttalǵan. Immuniguide platformasy matematıkalyq algorıtmder men jasandy ıntellekt tehnologııalary arqyly jalpy qan taldaýynyń kórsetkishterin óńdeıdi.
«Bul qarapaıym júıe desek te bolady. Ol daıyn taldaýlardy oqyp, zerthanalyq nátıjeni óńdeıdi. Immýndyq júıeniń jaı-kúıiniń naqty kórsetkishin beredi. Platforma rezervti ǵana emes, sondaı-aq adamnyń aǵzasyndaǵy nazar aýdarýdy qajet etetin qandaı jasyryn ınfeksııalar baryn kórsete alady», deıdi platforma avtorlarynyń biri, ınnovasııalyq medısına ǵylymı-klınıkalyq ortalyǵynyń jetekshisi medısına ǵylymdarynyń doktory Nurlybek Úderbaev.
Adam ımmýnıtetiniń jaı-kúıi týraly derek qaýiptiń aldyn alýǵa, aýrý saldaryn baǵalaýǵa, osal toptardy baqylaýǵa, aldyn alý men emdeý sharalaryn derbestendirýge múmkindik beredi. Bastapqyda ImmuniGuide elordanyń onkologııalyq klınıkalarynyń birinde engizilip, synalǵan. Platformany kúndelikti jumysta qoldaný dárigerlerge pasıentterdiń jaǵdaıyn baqylaýǵa kómektesti. Ǵalymdardyń aıtýynsha, el turǵyndary aǵzanyń ımmýndyq Chek-UP-yn tegin ótkize alady. Ol úshin Telegram arnasynda aqparat, sondaı-aq paıdalaný nusqaýlyǵy kórsetilgen «Immýnogıd» chat-botyn iske qosý qajet. Jalpy qan taldaýyn PDF formatynda júktegennen keıin, nemese taldaý nátıjelerimen sapaly fotosýret salǵannan soń nátıje 1 mınýtta daıyn bolady.