Almaty qalasynda taksı júrgizýshisine shabýyl jasaǵan jolaýshyǵa qatysty qylmystyq is qozǵaldy, dep habarlaıdy Egemen.kz.
Oqıǵanyń beınejazbasyn taksı júrgizýshisi ári bloger Vlad Kravchýk óziniń TikTok paraqshasynda jarııalaǵan. Beınejazbada Kravchýk jolaýshylardan kólik salonynda shylym shekpeýin suraǵan. Alaıda bul ótinishten keıin olardyń biri agressııalyq minez kórsetip, júrgizýshini balaǵattap, keıinirek onyń basynan uryp jibergen.
Qalalyq polısııa departamenti atalǵan oqıǵaǵa qatysty tergeý amaldary júrgizilip jatqanyn málimdedi.
«Medeý aýdandyq polısııa basqarmasy Qylmystyq kodekstiń tıisti baby boıynsha is qozǵap, sot-medısınalyq saraptama taǵaıyndady. Qazirgi ýaqytta tergeý amaldary júrgizilip jatyr», delingen habarlamada.
Aıta keteıik, qazirgi tańda júrgizýshige qol kótergen kúdikti izdestirilip jatyr.