Jol jóndeý jumystarynda sapaǵa salǵyrt qaraıtyn merdigerlerge qoıylatyn talap kúsheıdi. Keıingi ýaqyttary Almatyda joldaǵy shuńqyrlardy jóndeý jumystarynda mundaı olqylyqtardyń oryn alýy jıilegen. Bul týraly qala ákiminiń Alataý aýdanynyń turǵyndarymen kezdesýinde aıtyldy, dep jazady Egemen.kz.
Jol jóndeý kezinde oı-shuńqyrlar der kezinde jabylmaıtynyna shaǵymdanǵan turǵyndardyń talabyn eskergen Erbolat Dosaev, mobıldilik basqarmasynyń basshysy Saǵyndyq Telibaevqa atalǵan máseleni erekshe baqylaýǵa alýdy tapsyrdy.
«Eger asfalt oıylsa, ol jumys kúniniń sońyna deıin qalpyna keltirilýi tıis. Reglament bar, demek shuńqyrlardy jóndeýge jaýapty aýdandyq ákimdikter bul máselege tııanaqty bolýy kerek»,- dedi E. Dosaev.
Kezdesýde, kelisimsharttyq mindettemelerde bul normalar jazylǵanyn, biraq merdigerler asfalttyń ýaqytynda jetkizilmegenin nemese tehnıkanyń jetkiliksiz ekenin aıtyp, osy talaptardy oryndaı bermeıtini sóz boldy.
Qala ákimi, osyndaı jaǵdaılar boıynsha turǵyndar «e-Otinish», «Open Almaty» ákimdiginiń qoǵamdyq qabyldaýy nemese jol ınfraqurylymyna arnalǵan Almaty_Joly arnaıy Telegram-arnasynyń @almatyjolybot chat-boty arqyly shaǵymdana alatynyn málimdedi.