Almatyda Ulttyq áskerı-patrıottyq ortalyqtyń Jaýyngerlik dańq mýzeıiniń jańa «Ashyq aspan astyndaǵy mýzeı» bóliminiń saltanatty ashylý rásimi ótti. Jańa ekspozısıǵa 30-dan astam túpnusqa jáne qalpyna keltirilgen áskerı tehnıka úlgileri qoıylǵan, dep habarlaıdy Egemen.kz.
Ashyq aspan astyndaǵy aıryqsha mýzeıde barlyq eksponat qalpyna keltirilip, tehnıkalyq sıpattamalar men tarıhı málimetter jazylǵan taqtalarmen jabdyqtalǵan. Ekspozısııada Jeńistiń sımvolyna aınalǵan T-34 tanki, aty ańyzǵa aınalǵan BM-13 «Katıýsha» zymyran tasyǵyshy, sondaı-aq T-44 jáne T-55 sııaqty keńestik tankiler bar. Sonymen qatar, BTR-40, BRDM-1 jáne BRDM-2 bronetransporterleri, BMP-1 jaıaý áskerdiń jaýyngerlik mashınasy, ártúrli gaýbısalar, mınometter, zenıttik jáne dalalyq artıllerııa quraldary qoıylǵan.
Kórmeden erekshe qyzyǵýshylyq týdyratyn sheteldik sırek úlgilerdi de kórýge bolady. Olardyń arasynda 120 mm «Fınýlıaný» mınometi (Shvesııa), 158 mm «Kebelverh-41» mınometi (Germanııa) jáne 105 mm M-2A1 HOWITZER gaýbısasy (AQSh) birden nazar aýdartady. Sondaı-aq, 203 mm BL-39 gaýbısasy, 122 mm M-30 gaýbısasy, 100 mm BS-3 dalalyq zeńbiregi, ZPÝ-2 jáne S-60 zenıttik qurylǵylary, PM-120 jáne M-240 mınometteri syndy artıllerııalyq tehnıka da kórme tórinen oryn alǵan.
Is-sharanyń ashylý saltanatyna Qorǵanys mınıstriniń orynbasary, general-maıor Shaıh-Hasan Jazyqbaev, Almaty qalasy ákiminiń orynbasary Azamat Qaldybekov, Qarýly kúshterdiń ókilderi men ardagerlerdiń urpaqtary qatysty. Jeńis kúni qarsańynda aıryqsha jobany qolǵa alyp, jańa ekspozısııany jasaýǵa atsalysqan áskerı qyzmetkerler marapattaldy.
Jaýyngerlik dańq mýzeıi 1965 jyly qurylǵan jáne ol Almatydaǵy áskerı-patrıottyq tárbıe berýdiń mańyzdy ortalyǵy sanalady. Mýzeı toptamasy XIX ǵasyrdan qazirgi kúnge deıingi Qazaqstannyń áskerı tarıhyn qamtıdy. Negizgi qor maıdangerlerdiń túpnusqa qujattary, fotosýretteri, hattary, marapattary men jeke zattarynan turady. Materıaldardyń eleýli bóligin general Panfılovtyń qyzy – Panfılov dıvızııasynyń ardageri Valentına Panfılova tapsyrǵan.