Búgin Ortalyq kommýnıkasııa qyzmetiniń alańynda ótken brıfıngte Oqý-aǵartý mınıstri Ǵanı Beısembaev Memleket basshysy usynǵan «Jaıly mektep» jobasynyń erekshelikteri týraly aıtty, dep jazady Egemen.kz.
Bul — zamanaýı oqytý standarttaryna saı biryńǵaı bilim berý keńistigin qurý arqyly eldegi orta bilim deńgeıin júıeli túrde arttyrýǵa baǵyttalǵan strategııalyq bastama. Joba qala men aýyl mektepteri arasyndaǵy alshaqtyqty joıýǵa baǵyttalǵan. Mınıstr jobany iske asyrýdyń maqsaty – elıtalyq oqý oryndaryn qurý emes, bilim berý sapasynyń joǵary standarttaryn jappaı engizý ekenine nazar aýdardy. «Jaıly mektep» árbir balaǵa tolyqqandy damýǵa jáne óz áleýetin ashýǵa teń múmkindik beredi.
«Mektepterdiń zamanaýı tehnıkalyq jaraqtandyrylýy XXI ǵasyr daǵdylaryn qalyptastyrýǵa qolaıly orta jasaıdy. Buǵan analıtıkalyq oılaý men IT-quzyretterden bastap, zertteýshilik jáne shyǵarmashylyq qabiletterdi damytýǵa deıingi baǵyttar kiredi. Bilim berý modeliniń ereksheligi – teorııalyq daıyndyq pen zamanaýı jabdyqtalǵan zerthanalar men sheberhanalardaǵy praktıkalyq jumystardyń úılesimdi ushtasýynda. Muǵalimder oqýshylardyń erekshe qabiletterin ashýǵa múmkindik beretin toptyq jobalardan bastap ınteraktıvti ádisterge deıingi ozyq pedagogıkalyq tásilderdi qoldanady», dedi Ǵanı Beısembaev.
Sondaı-aq mınıstr endi bul strategııalyq jobanyń «Keleshek mektepteri» dep atalatynyn aıtty. Mınıstr joba óńirlik ekonomıkany birneshe baǵytta yntalandyratynyn da atap ótti.
«Birinshiden, mektep qurylystaryna jergilikti qurylys kompanııalary men jumysshy brıgadalar tartylady, bul – jańa jumys oryndarynyń qurylýyna tikeleı áser etedi. Ekinshiden, ár jańa mektep pedagogter men tehnıkalyq qyzmetkerler úshin jańa jumys oryndarynyń ashylýy. Jalpy alǵanda, elimiz boıynsha barlyq jańa mektepterdi kadrmen qamtamasyz etý úshin 2026 jylǵa deıin 30 myńnan astam jańa muǵalim qajet bolady. Budan bólek, zamanaýı mekteptiń ashylýy eldi mekenniń tartymdylyǵyn arttyrady: óńirge jas mamandar keledi, otbasylar qalaǵa kóshýdi azaıtady, mekteptiń aınalasynda ınfraqurylym damıdy. Joba mýltıplıkatıvti áser beredi – bul tek jumyspen qamtý ǵana emes, sonymen qatar óńirlerde adam kapıtalyna baǵyttalǵan uzaq merzimdi ınvestısııa», dedi Oqý-aǵartý mınıstri.