Keshe Memlekettik basqarý akademııasynda Memleket basshysynyń tikeleı bastamasymen qolǵa alynǵan Prezıdenttik jastar kadr rezervine kezekti irikteýdiń talaptaryn túsindirý maqsatynda kezdesý ótti.
Is-sharaǵa 250-ge jýyq ortalyq memlekettik organdar men oǵan qarasty uıymdardyń, jergilikti atqarýshy organnyń, kvazımemlekettik sektordaǵy kompanııalardyń qyzmetkerleri, sondaı-aq Prezıdenttik jastar kadr rezerviniń músheleri qatysty.
Jıyn shymyldyǵyn Memlekettik qyzmet isteri agenttiginiń tóraǵasy Darhan Jazyqbaı ashyp, Prezıdenttik jastar kadr rezervi jóninde áńgimelep, agenttiktiń aldaǵy josparlarymen tanystyrdy.
«Memleket basshysy Qasym-Jomart Toqaev 2019 jyly Prezıdenttik jastar kadr rezervin jasaqtaý qajettigi týraly bastama kóterip, osy tapsyrmany bizdiń agenttikke júktegen edi. Sodan beri agenttik atalǵan jobany tabysty júzege asyryp keledi. Biz bul bastama aıasynda jastardy memlekettik basqarý júıesine belsendi túrde tartýǵa, olardyń memlekettik qyzmettegi úlesin arttyrýǵa múmkindik alyp otyrmyz», dedi ol.
Sondaı-aq spıker 1 maýsymnan bastap, jastar kadr rezerviniń jańa irikteý kezeńi bastalatynyn, ol synda jasy 35-ten aspaǵan, joǵary bilimi men kemi 5 jyldyq jumys ótili bar, memlekettik tildi V deńgeıinen tómen emes meńgergen kez kelgen el azamattary baq synaı alatynyn aıta kelip, búgingi kezdesýdiń basty maqsaty jastarǵa osy joba týraly jan-jaqty málimet berýge baǵyttalyp otyrǵanyn jetkizdi. Agenttik basshysy aldaǵy ýaqytta aımaqtarda da osyndaı kezdesýler uıymdastyrylatynyn tilge tıek etti.
Agenttik tóraǵasy irikteýdiń 2025 jyldyń maýsym-qazan aılary aralyǵynda ótetinin, syn birneshe kezeńnen turatynyn, nátıjesinde rezervke úzdik 50 kandıdat iriktelip, rezervshiler 3 jyl ishinde konkýrstyq irikteýden ótpeı tikeleı túrli memlekettik laýazymdarǵa taǵaıyndalýy múmkin ekenin jetkizdi. Sondaı-aq D.Jazyqbaev qatysýshylardy bıyl alty salalyq baǵyt boıynsha baqtaryn synaýǵa shaqyrdy: ınfraqurylymdy, ónerkásipti damytý jáne saýda saıasaty, agroónerkásiptik keshen jáne qorshaǵan ortany qorǵaý, syrtqy saıasat jáne ınvestısııalar, ekonomıkalyq jáne qarjylyq saıasat, sıfrlandyrý, áleýmettik saıasat jáne azamattyq qoǵam.
«Elimizdiń damýyna úles qosa alatyn bilimdi, bilikti, belsendi jastarǵa memlekettik qyzmettiń esigi árdaıym ashyq bolýǵa tıis. Prezıdenttik jastar kadr rezervi – úlken múmkindik. Qazirgi tańda rezerv quramynda 400-ge jýyq jas bar, olardyń 318-i turaqty jumysqa ornalasyp, keıbiri qyzmette ósip, jaýapty laýazymdarǵa taǵaıyndaldy», dedi agenttik tóraǵasy.
Prezıdenttik jastar kadr rezervi arqyly Sıfrlyq damý, ınnovasııalar jáne aeroǵarysh ónerkásibi mınıstrligine qarasty Jasandy ıntellekt jáne ınnovasııalardy damytý komıtetiniń tóraǵasy bolyp taǵaıyndalǵan Ǵızzat Baıtursynov Prezıdenttik jastar kadr rezervi – jastardyń qyzmettik ósýine dańǵyl jol ashyp otyrǵanyn aıtady.
«Prezıdenttik jastar kadr rezervin jas mamandardyń ózderin jan-jaqty kórsetýine, bilimi men áleýetin paıdalanyp, memlekettik qyzmet pen kvazımemlekettik sektorda jaýapty laýazymdarǵa kóterilýine jol ashatyn áleýmettik lıft deýge bolady. Joba – zamanaýı ári bolashaǵy zor, elimizdiń kadr saıasatyna serpin beretin aýqymdy bastama», dedi ol.
Ǵızzat Seıdahmetuly Prezıdenttik jastar kadr rezervine kirý jolyndaǵy jeke tájirıbesimen bólisip, memlekettik qyzmetke 2020 jyly shtattan tys qyzmetker bolyp kelgenin, bar bolǵany tórt jyl ishinde basqarýshy qyzmetke deıin kóterilgenin, mundaı nátıjege jetýine Prezıdenttik jastar kadr rezervi múmkindik týǵyzǵanyn áńgimeledi.
Al Prezıdenttik jastar kadr rezerviniń múshesi retinde Halyqaralyq baǵdarlamalar ortalyǵynyń basqarma tóraǵasy bolyp qyzmetke kelgen Ádil Qusmanov: «Men – qazir Halyqaralyq baǵdarlamalar ortalyǵynyń basqarma tóraǵasymyn. Bul mekeme «Bolashaq» halyqaralyq stıpendııalyq baǵdarlamasynyń jumystaryn úılestiredi. Bizdiń basty maqsatymyz – sheteldiń myqty oqý oryndaryna bilimdi stýdentterdi jiberip, elimizdiń ekonomıkasyna qajetti mamandardy daıarlaý. Jyl saıyn álemniń úzdik ýnıversıtetterine keminde 600 azamatty oqýǵa jiberemiz. Qazirgi tańda ortalyq aıasynda transformasııa kezeńi júrip jatyr. Qazaqstannyń damýy úshin eń qajetti jáne suranysqa ıe mamandyqtarǵa basymdyq berýdiń tetikterin engizýge atsalysyp jatyrmyz. Mysaly, bıyldan bastap atom energetıkasy salasyna baǵyttalǵan mamandyqtarǵa basymdyq berý oıymyzda bar», dedi.
Resmı derekterge súıensek, 2019, 2021 jáne 2023 jyldary Prezıdenttik jastar kadr rezervine jalpy 60 myńnan asa azamat qyzyǵýshylyq tanytqan. Irikteýler qorytyndysy boıynsha rezervke 400 adam qabyldanyp, búginde olardyń 318-i jaýapty qyzmetterge taǵaıyndalypty. Rezervshilerdiń 167-i – ortalyq memlekettik organdarda, 37-i – jergilikti atqarýshy organdarda, 62-i – ulttyq kompanııalarda, 52-i ózge uıymdarda qyzmet etip jatyr. Sondaı-aq 39 rezervshi – saıası, úsheýi «A» korpýsynyń laýazymdaryna taǵaıyndalǵan. Al eki rezervshi Májilis depýtaty, bireýi máslıhat depýtaty bolyp saılanǵan.