Marokko astanasy Rabatta karateden Premer-lıga sanatyndaǵy jyldyń qorytyndy týrnıri aıaqtaldy. Bıylǵy 4 jarys nátıjesi boıynsha reıtıngte kóp upaı jınaǵan eki otandasymyz úzdik sportshyǵa beriletin Grand Winner atalymyna ıe boldy, dep jazady Egemen.kz.
Qazaqstan karate federasııasynyń málimetinshe, Marokko elinde sol atalymǵa ıe bolǵan Móldir Jańbyrbaı (-50 kg) jáne Ásel Qanaı (-61 kg). Osy ýaqytqa deıin ulttyq quramanyń 2 sportshysy qatarynan mundaı marapatqa ıe bolmaǵan eken.
Byltyr tuńǵysh ret Grand Winner júldesin jeńip alǵan Móldir Jańbyrbaı – Qazaqstannan atalǵan syılyqty 2 márte ıelengen alǵashqy karate sheberi.
M.Jańbyrbaı bıyl Parıjde (Fransııa) alǵashqy Premer-lıga básekesinde qola, Hanchjoýda (Qytaı) kúmis, Kaırde (Egıpet) altyn medalǵa qol jetkizgen. Al Ásel Qanaı Parıj ben Kaırde kúmis, Hanchjoýda qola medal enshilegen.