Jańa zań kúshine engennen keıin Almatydaǵy mopedke baılanysty másele qalpyna keldi. Bul týraly О́ńirlik kommýnıkasııalar qyzmetinde ótken basqosýda Qalalyq polısııa departamentiniń resmı ókili Saltanat Ázirbek málimdedi, dep habarlaıdy Egemen.kz.
Resmı aqparatqa qaraǵanda, qazir mopedshilerdiń 95%-y kóligin tirkeýden ótkizip, júrgizýshi kýáligin alyp úlgergen. Sondyqtan mopedin nómirsiz júrgizetinder burynǵydaı emes, saıabyrsypty. «2025 jyldyń 5 sáýirinen bastap kúshine engen jańa zańǵa baılanysty mopedterdiń barlyǵy tirkeýden ótip, memlekettik nómir, tehpasport, saqtandyrý polısin alýy tıis bolatyn. Endi arnaýly kýáligińiz bolsa ǵana mopedti júrgize alasyz, onsyz bolmaıdy», deıdi Saltanat Ázirbek. Bul jańa ereje joldaǵy qaýipsizdikti kúsheıtip, mopedti paıdalaný jaǵyn rettestirýdi kózdeıdi.
Polıseılerdiń aıtýynsha, moped tizgindegender tarapynan jol belgileri talabyn elemeý, tutas jolaqty kesip ótý, jolaqty aýystyrǵanda tutas syzyqty kesip ótý, shtatqa kirmeıtin – kózdi qaryqtyratyn sham, talapqa saı kelmeıtin dybys báseńdetkish sııaqty qural-saımandar salyp alý eń kóp kezdesetin zań buzýshylyqtar qatarynda.
Bıylǵy 5 sáýirden beri zań buzǵan osyndaı 5000 mopedtiń ıesi ákimshilik jaýapqa tartylyp, 2000 kólik aıyp turaǵyna qoıylǵan.
Jalpy alǵanda, ákimshilik polısııanyń aqparaty boıynsha osy ýaqytqa deıin Almatyda 15 myńnan astam moped tirkelipti.
Moped júrgizetinderdiń kóbi – kýrer bolyp isteıtin sheteldik azamattar kórinedi. «Zań jáne Tártip» qaǵıdatyn basshylyqqa alyp, Almaty polısııasy jol qaýipsizdigin arttyrý jumysyn jyl boıy jalǵastyra bermek.