Taldyqorǵan tórinde alǵash ret mektep oqýshylary arasynda «Teatr – tárbıe bastaýy» atty oblystyq teatr festıvali ótti. Bul – elimizde buryn-sońdy bolmaǵan tyń bastama. Aýdandardan kelgen úzdik óner ujymdary, qoǵamdaǵy ózekti taqyryptardy sahnalady.
Adam balasynyń rýhanı álemi jańbyr tilegen kóktemgi aspandaı keıde múlgip, shóldep turatyny ras. Sondaı sátterde janǵa shıpa, júrekke medet bolar jalǵyz ǵana meken bar – ol teatr. Sebebi teatr – tiri óner. Ol – adamnyń ishki álemin sózben de, sezimmen de terbetetin shyndyqtyń sahnasy, ómirdiń boıaýyn boıamasyz beretin aınasy. Osy kıeli ónerdiń tárbıelik qýatyn jas urpaqtyń boıyna sińirý maqsatynda Jetisý ólkesinde tuńǵysh ret mektepishilik teatrlar arasynda baıqaý uıymdastyrylyp, úsh kún boıy Taldyqorǵan qalasy óner men shabyttyń ordasyna aınaldy. Bul baıqaý – óner arqyly tárbıe berýdiń, jas sanany oıatýdyń, rýhanı qundylyqtardy darytýdyń ozyq úlgisi.
Oblystyń túkpir-túkpirinen kelgen 50 mekteptiń teatr ujymy ózara saıysqa túsip, ózektiligi joǵary bes taqyryp aıasynda qoıylym usyndy. «Nashaqorlyq», «Jasóspirimder býllıngi», «Ustazyn ulyqtaǵan urpaq úni», «Ata-ana, oqýshy, ustaz», «Meniń armanym» syndy taqyryptarda sahnaǵa shyqqan jas akterler kórermenge tereń oı tastaı aldy. О́nerpaz órender sahna tili men akterlik sheberlikti kásibı deńgeıde ıgergenin kórsetti. Baıqaýdyń qazylar alqasy quramynda Qazaqstannyń eńbek sińirgen qaıratkeri Kendebaı Temirbaıuly men halyq ártisi Almahan Kenjebekova syndy teatr tarlandary boldy.
«Oqýshylar teatry – jaı sahna emes, ol – balanyń ishki jan dúnıesin túletetin, qııalyna qanat bitiretin, júregindegi shyraqty mazdatatyn erekshe alań. Munda bala tek ról oınap qoımaıdy, ómirdi túsinip, ózin tanýǵa, adam bolmysyna úńilýge mashyqtanady. Bul – tárbıeniń eń názik, eń áserli túri», dedi A.Kenjebekova.
Baıqaýǵa qatysýshylar kórkemdik, tehnıkalyq turǵydan da daıarlyqpen kelgen. «Teatr Time» úıirmesiniń jetekshisi Janar Beısenbaevanyń aıtýynsha, bul baıqaýǵa oqýshylar 2 aı kóleminde daıyndalǵan.
«Ssenarıı – meniń ustaz retindegi ishki tolǵanysymnan týǵan dúnıe. Oqýshym Qýanyshpen birge zamanaýı ustaz beınesin jasaýǵa tyrystyq. Qoıylymda tek akterler emes, kostıýmer, grımer, mobılograf syndy shyǵarmashylyq top ta eńbek etti. Bul – barlyǵymyzdyń ortaq jeńisimiz», deıdi ol.
Keıipkerler arqyly sahna tórinde otbasy qundylyǵy, dostyqtyń máni, ustazǵa degen qurmet pen otansúıgishtik rýh kórkem tilmen jetkizildi. Oqýshylar jaı ǵana kórinis kórsetip qoıǵan joq, olar óz oılaryn, azamattyq ustanymdaryn ashyq aıtyp, sahna arqyly qoǵammen suhbat qurdy.
Festıvaldiń sońǵy kúninde ótken saltanatty marapattaý keshi naǵyz óner merekesine aınaldy. Kórermen zalyn toltyrǵan ata-analar, ustazdar men qonaqtar jas sahnagerlerdiń sheberligine tánti boldy. Keshke oblys ákiminiń orynbasary Marlen Kólbaev arnaıy qatysyp, qatysýshylarǵa júrekjardy lebizin bildirdi.
«Teatr – ult rýhynyń aınasy, rýhanı jańǵyrýdyń negizgi dińgegi. Osyndaı bastamalar – jas býynnyń bolashaqta sanaly azamat bolyp qalyptasýyna úlken serpin beredi. Bul baıqaý tek óner saıysy emes, jas býyndy tárbıeleýdiń, olardyń oı-sanasyn oıatýdyń úlken quralyna aınaldy. Ár qoıylymda búgingi qoǵamnyń kúrdeli máseleleri – jasóspirimderdiń ishki kúızelisi, otbasy men mektep arasyndaǵy baılanys, ustazǵa qurmet, ulttyq arman men bolashaqqa senim tereń beınelendi», dedi M.Kólbaev.
Onyń aıtýynsha, jastardy rýhanı qoldaýǵa baǵyttalǵan jobalar jalǵasady. Keler jyly bul baıqaýdyń aýqymy keńeıip, dástúrli sharaǵa aınalady. Baıqaý barysynda úzdik shyqqan oqýshylar men teatr ujymdary qarjylaı syılyqtarǵa ıe boldy. Tipti «Úzdik jas aktrısa» «Úzdik jas akter», «Úzdik sahnalyq kostıým», «Úzdik jas rejısser», «Úzdik dekorasııa» sekildi atalym ıegerlerine de aqshalaı sertıfıkat tabystaldy.
Teatr arqyly bala óz bolmysyn tanıdy, ómirdi baǵalaýdy úırenedi. Jetisý jerindegi bul ıgi bastama aldaǵy ýaqytta elimizdiń ózge óńirlerine de úlgi bolyp, ulttyq ónerdiń jańa kókjıegin ashady degen senim mol. Sahna – shyndyqtyń aınasy. Sol aınaǵa qarap ósken urpaq erteńgi eldiń eńsesin kóterer azamattary bolmaq. Oqýshylardyń teatrǵa degen qyzyǵýshylyǵy men belsendiligi baıqaýdyń tabysty ótkenin dáleldedi.
Jetisý oblysy