Alakól aýdanynyń Dostyq aýylynda 600 oryndyq «Keleshek mektebi» jańa oqý jylynda ashylady. Sonymen qatar Úsharal qalasynda da 600 oryndyq jańa mektep qurylysynyń jobasy daıyndalýda. Bul týraly Jetisý oblysynyń ákimi Beıbit Isabaev aýdan turǵyndarymen kezdesý barysynda málimdedi, dep habarlaıdy Egemen.kz.
Bilimmen qatar medısına salasy da nazarda. О́tken jyly Qamysqala aýylynda dárigerlik ambýlatorııa, Arqarly, Qońyr jáne Bıbaqan aýyldarynda úsh medısınalyq pýnkt iske qosyldy. Bıyl taǵy 12 densaýlyq saqtaý nysanyn ashý kózdelip otyr, onyń 9-y «Aýyldaǵy densaýlyq saqtaýdy jańǵyrtý» ulttyq jobasy aıasynda salynýda.
Aýdanǵa úsh sanıtarlyq kólik berilip, zamanaýı medısınalyq qurylǵylar satyp alýǵa qarjy bólindi. Qajetti qural-jabdyqtar qazan aıyna deıin jetkiziledi. Sondaı-aq ótken jyly aýdanǵa kelgen 9 dárigerge 80 mln teńge kóleminde kóterme járdemaqy berilip, 7 dárigerge turǵyn úı usynylǵan.
Sport jáne mádenıet salalaryna da kóńil bólinýde. Dostyq aýylynda dene shynyqtyrý-saýyqtyrý kesheni paıdalanýǵa berilse, bıyl Lepsi aýylynda osyndaı keshen men 244 oryndyq jataqhana qurylysy aıaqtalyp, qyrkúıekte ashylady. «Aýyl – El besigi» baǵdarlamasy aıasynda Ekpindi men Kólbaı aýyldarynda mádenıet úıleri salynyp jatyr.
2024–2025 jyldary Alakól aýdanyna ınfraqurylymdyq jáne áleýmettik nysandar qurylysyna 41,5 mlrd teńge bólindi. Bul – oblystaǵy eń iri bıýdjetterdiń biri. Ákim tıisti mekemelerge bólingen qarjyny tıimdi ári sapaly ıgerýdi tapsyrdy.