5 tamyz kúni Aqtaýdaǵy jekemenshik "Tumar" balabaqshasynda (24-shaǵynaýdan) jaǵa ustatarlyq oqıǵa boldy. Kishi topta tárbıe alyp júrgen búldirshindi basqa bir qyz bala tunshyqtyryp, soqqy jasap, túrli zorlyq kórsetken, dep habarlaıdy Egemen.kz.
Baqylaý kamerasynan alynǵan vıdeoda búldirshinniń aıqaılap, ózin qorǵaýǵa tyrysqany, ony uryp, tistep, moınynan ustap tósekke basyp jatqany anyq kórinedi. Bul jaǵdaı shamamen 15 mınýtqa sozylǵan. Osy ýaqytta bólmede birde-bir tárbıeshi nemese kútýshi bolmaǵan, eshkim aralaspaǵan.
Ata-analar oqıǵa týraly keshke, qyzdaryn alyp ketýge kelgen kezde ǵana bilgen. Búldirshinniń beti isip ketken, denesinde tistegen izder, kógergen jerler men jaraqattar bolǵan.
Balabaqsha qyzmetkerleri dáriger shaqyrmaǵan jáne ata-anasyna eshqandaı eskertý jasamaǵan. Oqıǵanyń vıdeosyn talap etken kezde balabaqsha basshylyǵy "máseleni polısııasyz sheshýdi" usynǵan.
- Vıdeoda qyzymdy uryp, tunshyqtyryp jatqany anyq kórinedi. Bólmede birde-bir eresek adam joq. Eger ol kóz jumǵanda ǵana qımyldaıtyn ba edińizder? - deıdi zardap shekken balanyń anasy.
Atalǵan fakti boıynsha Qylmystyq kodekstiń 140-baby — "Kámeletke tolmaǵan balany tárbıeleý jónindegi mindetterdi oryndamaý" boıynsha qylmystyq is qozǵaldy.
- Tergeý barysy Mańǵystaý oblystyq polısııa departamenti basshylyǵynyń baqylaýynda. Qazir tergeý amaldary júrgizilip jatyr, - dep habarlady polısııa ókilderi.