Borash. Eńbekti súıgen er, aýylyna janashyr, atymtaı jomart Boranbaı Muqanalıevtiń el ishindegi ekinshi esimi osyndaı. Barshyn aýylynyń órisine myńǵyrǵan malyn órgizip, sharýashylyǵyn shalqytyp otyrǵan eńbek ardageri – aýylynyń qamqorshysy.
Boranbaı Qasymbekuly – jaqsynyń jalǵasy, tektiniń tuıaǵy. Ákesi Qasymbek – Ekinshi dúnıejúzilik soǵystyń ardageri, «Dańq», basqa da orden-medaldardyń ıesi. Aıbarly ákeniń tálimimen jigerin janyp ósken jas jigit áskerge shaqyrylǵan ýaqytta Aýǵanstan jerinde soǵys júrip jatqan edi. Sol aımaqta áskerı boryshyn oıdaǵydaı ótep, elge esen-aman oraldy. Aýǵan soǵysynyń ardageri Boranbaı Qasymbekulynyń da omyraýynda avıasııa general-maıory «Talǵat Bıgeldınov», «Saǵadat Nurmaǵambetov» medali, «Internasıonalıst-jaýynger» tósbelgisi bar. Munyń bári – Qasymbek ákeniń qanymen kelgen qaısarlyqtyń úlgisi.
Aýǵan dalasynan orala sala eńbekke aralasyp, shaǵyn malmen sharýashylyq qurady. Sol qysy-jazǵy qyp-qyzyl beınettiń, mańdaı terdiń óteýi – órisi tolǵan maly. Bala kezinen malsaq bolyp ósken azamat úıir-úıir jylqysynyń túsin tústep tanı alady. Sóıtip, Boranbaı Qasymbekulynyń muqalmas jigerimen «Muqanalıev» fermer qojalyǵy aýdandaǵy irgeli agrokeshenge aınaldy.
«Búginde memleket aýyl sharýashylyǵyn damytýǵa erekshe kóńil bólip otyr. Mal sharýashylyǵyn damytýda jeńildetilgen nesıeler, iri qara malǵa sýbsıdııalar berý, tehnıkany lızıngke alý isi durys jolǵa qoıylǵan. Solardy sharýalar utymdy paıdalansa bolǵany. Osy qoldaýlar arqyly sharýashylyqqa jańadan 5-6 mal qora saldyq. О́zim «Sybaǵa» baǵdarlamasymen 100 iri qara alyp, ósirip otyrmyn. Baıqaý arqyly jalǵa jer alyp, jaıylymdy keńeıttik. Maldyń tuqymyn asyldandyrý máselesi de qolǵa alyna bastady. Bes bas asyl tuqymdy buqa ákelindi. Jalpy, asyl tuqymdy buqa satyp alamyn degen sharýaǵa memleket tarapynan bolatyn kómek qazir qomaqty. Sýbsıdııa arqyly onyń qunynyń belgili bir bóligin ótep beredi. Astanaǵa jaqyn mańaıdan jer alyp, mal bordaqylaý alańyn saldyq, ol da óz jemisin berip jatyr», deıdi sharýashylyq basshysy.
Mal baqqanǵa bitedi. Sharýanyń basy-qasynda Boranbaı Qasymbekulynyń ózi júredi. At minip, órisin aralap, tórt túligin túgendemese, kóńili kónshimeıdi. О́mir boıǵy salty solaı. Sodan da bolar, eńbegi jandy, beıneti baǵyn da, baryn da eseledi.
Aýyldy kúl-qoqystan tazalaý, sý qubyrlary isten shyǵyp qalsa, ony jóndeý sekildi sharýalar Boranbaı myrzanyń demeýshiligimen júzege asady. Munymen qosa, aýylda qańyrap qalǵan ǵımaratty óz qarajatyna kúrdeli jóndeýden ótkizip, balalar men jasóspirimderge sportzal ashyp berdi. Qazir aýyl balalary boks, kúres seksııalaryna baryp júr.
Aýylyndaǵy toqsan jastaǵy ananyń eski úıin súrip, jańa úı salyp bergen saqı da ózi. Aýyldyń mektebine, aýrýhanasyna únemi kómektesedi. Áleýmettik toptaǵy aǵaıynǵa jyl saıyn tegin soǵym beredi. Byltyr Nura aýdanynyń 90 muqtaj otbasyna et taratty. Odan bólek, mal soıý alańyn salyp, qoldanysqa berdi. Aýyl zıratyn qorshatty. Nura óńirindegi mádenı, sporttyq is-sharalarǵa únemi demeýshilik kórsetedi. Pandemııa kezinde aýylyn tegin dári-dármekpen qamtamasyz etti. Mal jaıylymyndaǵy sý shaıyp buzylǵan eki bógetti qalpyna keltirdi. Kórshi Tikenekti aýylyndaǵy meshittiń qurylysyna qarjylaı kómek kórsetti. Aýylyna kóship kelgenderge de qaraılasady. Soǵymyn, jemshóbin, kerek bolsa aldyna malyna deıin salyp beredi.
Boranbaı Qasymbekuly aýdandyq máslıhattyń birneshe shaqyrylym depýtaty. El amanatyn oryndaý maqsatynda Astana, Qaraǵandyǵa jıi qatynap júrip, aýylǵa «Bılaın» mobıldik baılanys júıesin ornatyp berdi. Mine, bul atymtaı azamat jasaǵan jaqsylyqtyń biz biletin bir parasy ǵana.
Zaıyby Záýre Qazanbaıqyzy – memlekettik qyzmettiń qazanynda qaınaǵan jan. Qazir qurmetti eńbek demalysynda. Qyzmet etken jyldary aýylynyń ósip-órkendeýine ólsheýsiz úles qosyp, eldiń batasyn alǵan. Záýre Muqanalıevanyń eńbegi janyp, Memlekettik qyzmet isteri agenttigi uıymdastyrǵan «Úzdik aýyl ákimi» respýblıkalyq baıqaýynyń «Úzdik ashyq ákim» atalymyn jeńip alǵan. Teńiz óńirine órkenıet syılaǵan ákim retinde esimi el aýzynda. Ol ákim bolyp turǵan tusta atqarylǵan jumys az emes. Atap aıtar bolsaq, «Aýyl – el besigi» jobasy aıasynda kósheler asfalttaldy. 284 jaryq shamdary qoıyldy. Aýyldyń polısııa bóliminiń ǵımaraty kúrdeli jóndeýden ótti. Eki elektr transformatory alyndy. Tórt birdeı eldi mekenge balalar oıyn alańy ornatyldy. Aýyl jastaryna arnalyp kovorkıng ortalyǵy ashyldy. Aýrýhanaǵa jańa jylytý qazandyǵy qoıyldy. Jedel járdem kóligi, mektep balalaryn tasymaldaýǵa avtobýs satyp alyndy.
Munymen qosa, jas mamandarǵa eki páterli úı salynǵan. Eki birdeı dóńgelek jóndeý sheberhanasy men naýbaıhana, dámhana ashylyp, qazir aýyl halqyna qyzmet kórsetip otyr. Osyndaı ıgilikti istiń bárine Záýre ákim uıytqy boldy. Oǵan basty qoldaýdy árıne, asyl azamaty Boranbaı Qasymbekuly kórsetti.
Jary Záýresh ekeýiniń osydan qyryq jyl buryn qurǵan shańyraqtary búginde úbirli-shúbirli áýletke aınalǵan. Uldaryn uıaǵa, qyzdaryn qııaǵa qondyrǵan. Bárine eńbekti erteden úıretken ekeýi balalarynyń, nemere, jıenderdiń qyzyǵyna kenelip otyr.
Mańdaı ter túbi tórge shyǵarady. Eńbegimen eńseli Boranbaı Qasymbekuly abyroı bıiginde, qurmettiń tórinde. Keýdesinde Memleket basshysynyń Jarlyǵymen berilgen «Eren eńbegi úshin», «Shapaǵat» medali jarqyraıdy. Nura aýdanynyń qurmetti azamaty.
Teńiz óńiriniń órkendeýine telegeı úlesi bar Barshyn baǵlanynyń júregi osylaısha «aýylym» dep búlkildeıdi. Ardaqty azamatty aýyly da sáıkesinshe alaqanyna salyp otyr. «Budan asqan qandaı baqyt bar?» deıdi atpal azamattyń ózi.
Qaraǵandy oblysy,
Nura aýdany,
Barshyn aýyly