1896 jyly Reseıdiń Týla qalasynda Vasılıı Batashevtiń bý samaýryn fabrıkasynan shyqqan mys samaýryn Qarqaraly tarıhı-ólketaný murajaıynda saqtaýly.
Bul qundy jádigerdi 2008 jyly qazaqtan shyqqan tuńǵysh zań magıstri Jaqyp Aqbaıulynyń týystary mýzeıge tabystaǵan. Samaýryn Qoıandy jármeńkesinen satyp alynǵan.
Jaqyp Aqbaıuly Qarqaralydaǵy aýqatty tatar kópesi Halıolla Bekmetovtiń qyzy Gúlbaharǵa úılengen. Sol zamanǵy baılar men kópester arasynda qyzyqty dástúr bolǵan. Árkim óz samaýrynynyń tez qaınaýyna bás tigetin. Tipti qaǵaz aqshany sýǵa tastap, qaınaǵan kezde shyǵaryp alatyn ádet te bolǵan desedi.
«Mýzeıdegi osy samaýryn Halıolla Bekmetovke tıesili bolǵan. Bir jolǵy bás kezinde dál osy samaýryn birinshi qaınap, kelisim boıynsha Qoıandy jármeńkesiniń bir jylǵa bas aksıoneri atanǵan eken», deıdi murajaıdyń ǵylymı qyzmetkeri Sátbek Slambekov.
Atalǵan tarıhı jádiger sol dáýirdiń turmys-tirshiligi men mádenı ómirinen syr shertip tur.
Qaraǵandy oblysy,
Qarqaraly aýdany