Bıyl egis alqaptaryn ártaraptandyrý nátıjesinde óńirde aýyl sharýashylyǵy daqyldary 510,7 myń gektarǵa sebildi. Ásirese qant óndirisiniń damýyna erekshe kóńil bólindi. Byltyr oblysta rekordtyq ónim jınalyp, óńirdegi eki zaýyt 67 myń tonna qant óndirgen. Bıyl tátti túbirdiń egis alqaby 12,1 myń gektarǵa qysqarǵanymen, 540 myń tonna qyzylsha jınalady dep kútilip otyr.
Aqsý men Kóksý qant zaýyttary bıyl 78 myń tonna qant óndirýge tıis. Onyń 54 myń tonnasy qyzylshadan, 24 myń tonnasy qamys quraǵynan alynady.
«Qyzylsha ósirýge den qoıyp, alqapty ulǵaıtyp jatqandardyń qatarynda biz, Aqsý aýdanynyń sharýashylyqtary da barmyz. Bul daqyldyń tuqymyna beriletin sýbsıdııa kólemi artty, zaýyttar da satyp alý baǵasyn kóterdi. Aqsýdaǵy qant zaýytynyń ónim qabyldaý kólemin ulǵaıtýy da jaǵdaıdy ońaltýǵa septigin tıgizdi. Bıylǵy maýsymda ár gektardan 100 tonnadan astam ónim jınaımyz dep josparlap otyrmyz. Bizdiń sharýashylyqta buryn-sońdy mundaı tolymdy ónim bolmaǵan edi» deıdi«Janys-K» JShS sharýa qojalyǵynyń dırektory Ǵalbııat Samarqanuly.
Byltyrǵy maýsymdyq kezeńde aqsýlyq kásiporynda 500-den astam jumysshy eńbek etken. Qant qyzylshasynyń negizgi kólemi Aqsý, Sarqan jáne Alakól aýdandarynan jetkizildi. Qabyldaý jáne óńdeý jumystary 6-7 aıǵa sozylyp, zaýyt úzdiksiz rejimde jumys istedi.
«Memlekettik qoldaýdyń arqasynda sharýalarǵa 1 tonna ónimge 40 myń teńge tólendi. 25 myń teńgesi sýbsıdııa, qalǵan 15 myń teńge zaýyt esebinen berildi. Bul sharalar fermerlerdiń qant qyzylshasyn ósirýge degen yntasyn arttyryp, ónim kólemin ulǵaıtýǵa úlken áser etti» deıdi oblystyq Aýyl sharýashylyǵy basqarmasynyń basshysy Nurdáýlet Kenenbaev.
Qazir zaýyttyń avtomattandyrylýy men óndiristik jelilerin jańartý jumystary qolǵa alynyp jatyr. Bul jańǵyrtý zaýyttyń jyl boıy úzdiksiz jumys isteýine jaǵdaı jasaıdy. Bıyl zaýyt 350 myń tonnadan astam tátti túbir qabyldaýdy josparlap otyr. Sóıtip, óńirde qant qyzylshasyn óńdeý qýaty 800-900 myń tonnaǵa deıin jetkizilýge tıis. Osyǵan oraı qant qyzylshasynyń egis alqaptary edáýir ulǵaıǵan. Aýyl sharýashylyǵy taýar óndirýshileri tuqym, tyńaıtqysh, janar-jaǵarmaı, tehnıkamen tolyq qamtamasyz etilgen. Sonymen qatar janar-jaǵarmaı, tuqym men tyńaıtqyshqa jeńildetilgen qarjylandyrý jáne ákimshilik jeńildikter qarastyrylǵan.
Aqsý qant zaýyty qantpen qatar qant qyzylshasynan alynatyn jomdy (qaldyq qurama) óńdeý isine de kiristi. Qazirdiń ózinde jomdy saqtaý jáne keptirýge arnalǵan arnaıy qoıma salyndy, zamanaýı qurylǵylar ornatylyp jatyr. Bul baǵyt zaýyttyń ekonomıkalyq tıimdiligin arttyryp qana qoımaı, mal sharýashylyǵy úshin de mańyzdy ónim kózine aınalmaq. Al Kóksý qant zaýyty jylyna 300 myń tonna qant qyzylshasyn óńdeıdi. Qazir kásiporyn tolyq júktememen jumys istep jatyr. Qýattylyqty arttyrý úshin 2025–2026 jyldary 29 mlrd teńge ınvestısııa tartylady. Keńeıtý nátıjesinde zaýyttyń jyldyq qýaty 500 myń tonnaǵa deıin jetýge tıis.
Jetisý oblysy