Almatyda el jastarynyń eleýli bóligi turady. Megapolıste kúni búgin 712 myńnan astam jastar sanatyndaǵy azamattar bar. Olardy turaqty jumyspen qamtý kún tártibinen túspeı kele jatqan ózekti másele, dep jazady Egemen.kz.
Jyl basynan beri qalada 21 700 jas jumysqa ornalasqan. Olardyń 15700-i turaqty, 6 myńy ýaqytsha jumyspen qamtylypty. Sıfrlyq platformalardy damytý, qysqa merzimdi kýrstardy iske qosý, mansap jármeńkelerin uıymdastyrý, komıýnıtı-ortalyqtar arqyly qoldaý kórsetý, jumys berýshilermen ózara árekettestiktiń jańa formasyn engizýdiń arqasynda birshama jas eki qolǵa bir kúrek tapqan.
Qazir Almatyda 712 myń jas baryn joǵaryda aıttyq. Olardyń 442 myńy jumys isteıtinder de, 280,7 myńy – stýdentter, shamamen 80 myńy joǵary synyp oqýshylary.
- Ekonomıkalyq belsendi jastardyń sany – 472,1 myń adam, onyń ishinde 452,6 myńy jumyspen qamtylǵan. Olardyń 396,7 myńy jaldamaly jumysshylar bolsa, 56 myńy ózin-ózi jumyspen qamtyǵandar.NEET-jastardyń úlesi qazirgi ýaqytta 5,8%. Jyl saıyn joǵary oqý oryndaryn shamamen 50 myń adam bitiredi. Olardyń 60–80%-y Almatyda qalyp, osynda jumysqa ornalasýǵa umtylady, – deıdi Jastar Saıasaty basqarmasy basshysynyń orynbasary Almaz Keńesbaı.
Qala jastaryn jumyspen qamtý maqsatynda qurylǵan karera ortalyǵyna jyl basynan beri 5 myńnan astam jas júgingen bolsa, olardyń 4 myńy jumysqa ornalasyp, qala aýdandarynda «Karera kúnderi» ótken. «Jasyl el» jobasy boıynsha da jaz mezgilinde 2,1 myń stýdent ýaqytsha jumyspen qamtylǵan.
Máseleniń sheshilýine arnaýly sıfrlyq portal aýqymdy úles qosyp keledi. Portalda 3,5 myńnan astam jumys berýshi tirkelgen, 2,1 myńnan astam bos jumys orny bar, qoldanýshylar sany 35 myńnan asqan. Osy platforma arqyly 1,8 myń adam jumys tapty. Olardyń 82%-y joǵary bilimdi bolǵanymen, 91%-ynyń tájirıbesi joq, bul bastapqy jumyspen qamtýdyń mańyzdylyǵyn kórsetedi.
Almatynyń ár aýdanynda ornalasqan 11 jastar komıýnıtı-ortalyǵy jumyspen qamtyp, qoldap, damýǵa septesetin orynǵa aınaldy. Jyl basynan beri bul ortalyqtarǵa 6 myńnan astam jas júgingen. 3,9 myńy jumys máselesi boıynsha, 2,1 myńy – psıhologııalyq jáne quqyqtyq kómek alý úshin. 9 aı ishinde 1,5 myńnan astam is-shara ótkizilip, 200 myńnan astam adam jumysqa ornalasqan.
Sonymen qatar, Almaty qalasynyń Jumyspen qamtý jáne áleýmettik baǵdarlamalar basqarmasymen birlesip, jastardy jumyspen qamtýǵa járdemdesý boıynsha keshendi jumys júrgizilip jatyr.Atalǵan jumys aıasynda Eńbek mobıldiligi ortalyǵy arqyly turaqty jáne ýaqytsha jumysqa 8,4 myń jas jumysqa ornalasty.
Budan bólek, Almaty qalasynyń Jumyspen qamtý jáne áleýmettik baǵdarlamalar basqarmasy jastardy kásibı baǵyttaý maqsatynda «Mansap kompasy» sıfrlyq platformasyn engizip, damytyp jatyr. Nátıjesinde atalǵan platforma arqyly 3,7 myń adam jumyspen qamtyldy.Osylaısha, jyl basynan beri jalpy 21,7 myń jas jumysqa turdy. Onyń ishinde 15,7 myńy turaqty, 6 myńy ýaqytsha jumysqa ornalasqan.
Jastardyń jumysqa ornalasýyna kedergi keltiretin máselelerdi sheshý (tájirıbeniń bolmaýy, aqparattyń jetkiliksizdigi, jumys berýshimen baılanystyń joqtyǵy) úshin jańa formattar engizile bastady. Jazda «New Generation Leaders» atty alǵashqy kareralyq olımpıada ótip, oǵan 3 myńnan astam stýdent qatysyp, 70 komanda 350-den astam sheshim ázirledi. Sonyń arqasynda 200 adam jumys taýyp, 700-i biliktiligin jetildirdi.
Sondaı-aq, jumyssyz túlekterdi tirkep, olardy Qalalyq karera ortalyǵyna baǵyttaý úshin call-ortalyq ta qurylǵan. Jastardy aqparattandyrý maqsatynda MIB jáne PIK-pen (OSI ı KSK) qyrýar jumys istelip jatyr, bul komıýnıtı-ortalyqtarǵa keletinder sanyn jylyna 400 myńnan 600 myń adamǵa deıin arttyrýǵa múmkindik bermek.
Jańadan Career Speed Dating formaty da engizildi. Munda jastar ózin tanystyryp, kompanııalar sol jerde ózine kerek mamandy tańdap alady. Ár komıýnıtı-ortalyqta 5–10 seriktes jumys berýshi ornalasady. Olar keńes berip, jumysqa alyp, jastardy eńbek naryǵyna beıimdeýge kómektespek.