Joıylýǵa sál-aq qalǵan Amýr jolbarysynyń zoobaq jaǵdaıynda kóbeıýi genetıkalyq alýandyqty saqtap, popýlıasııany qorǵaýda asa mańyzdy.
Haıýanattar baǵy qyzmetkerleriniń aıtýynsha, 6 jasar Bentlı men 5 jastaǵy Aıkı esimdi amýr jolbarysy jubynan týǵan kúshikterdiń (shónjik) ekeýi de erkek. Bul – sońǵy jyldardaǵy alǵashqy shónjikter ári «Qyzyl kitapqa» engen sırek túrdi saqtaýǵa qosylǵan erekshe úles.
Jolbarystar tabıǵatynan jalǵyz júretin jyrtqysh bolǵandyqtan, olardy juptastyrý ońaı emes. Zoobaq mamandary saý shónjik alý úshin qyrýar sharýa atqarylǵanyn aıtady. Sebebi kózin ashqan kúshikter jetilgenshe kóp kútimdi qajet etedi. Kishkentaı jyrtqyshtar alǵashqy aılaryn arnaıy tynysh aımaqta ótkizdi. Bul – shý men syrtqy dybysty oqshaýlaıtyn arnaıy voler. Mundaı jaǵdaı urǵashy jolbarystyń kúızelisin tómendetip, kúshikterdiń durys damýy úshin qajet.
«Amýr jolbarystarynyń analyqtary asqan sezimtal. Sondyqtan kúshiktegennen keıin olardy oqshaýlaý mańyzdy. Jolbarystar alǵashqy aılarda shónjigin qorǵaý úshin kez kelgen syrtqy dybys pen kózge túsetin áserlerge sezimtal bolady. Sondyqtan biz oǵan akýstıkalyq, vızýaldyq áseri tómen orta jasadyq. Úsh aıǵa deıin jolbarys kúshikteri «sezimtal kezeńnen» ótti. Bul ýaqytta artyq dybys pen ıis analyqtyń mazasyzdanýyna, sonyń saldarynan tóldiń damýyna áser etýi múmkin. Osy ýaqyt boıy jolbarystar kúndelikti veterınarlyq baqylaýda boldy. Qazir karantın aıaqtaldy, kúshikterdiń jaǵdaıy jaqsy, naǵyz jolbarysqa tán qylyqtaryn kórsete bastady», – deıdi zoobaqtyń bas veterınary Vıtalıı Sachkov.
Kúni keshe olar jańa volerge kóshirildi. Endi haıýanattar baǵynyń qonaqtary zoobaqtyń osy jańalyǵymen erkin tanysa alady.
ALMATY