Qalamger turǵan úıge eskertkish taqta ornatyldy

Ákim Tarazı sanaly ǵumyryn sóz ónerine arnap, tól ádebıetimiz ben mádenıetimizdi damytýǵa zor úles qosty. Daryndy qalamger ádebıettegi shyǵarmashylyǵyn «Quıryqty juldyz» povesinen bas­tap, «Tasjarǵan», «Ken», «Jaza», «Sher», «Mahabbat jyry», «Qııanat» syndy qalyń oqyr­man izdep júrip oqıtyn birneshe romandy dúnıege ákeldi.

Dramatýrgııa men qazaq kıno ónerine de óshpes iz qaldyryp, «Kúl­meıtin komedııa», «Jaqsy kisi», «Joly bolǵysh jigit», «Qos bozdaq» sekil­di pesalardy, «Tulpardyń izi», «Ar­man ataman», «Qarash-Qa­rash oqıǵasy», «Qyzjylaǵan», «Mus­­tafa Sho­qaı» syndy qazaq kıno óneriniń altyn qoryna engen fılm­derdiń ssenarıılerin jazdy.

Osyndaı tynymsyz izdenisi arqyly qazaq prozasynyń tynysyn keńeıtip, «Ádebıet áleminiń Ákimi» degen ardaqty atty ıelengen qalamger ómiriniń sońǵy jyldary Astana qalasynyń rýhanı kemeldenýine de aıanbaı ter tókti.

Ákim Tarazı turǵan úıdiń qa­byrǵasyna ornatylǵan eskertkish taqtanyń ashylý saltanatynda qazaq ádebıetiniń kórnekti ókili, jazýshy Tólen Ábdik jazýshynyń ekinshi ómiri bastalǵanyn tilge tıek etti.

«Dúnıeden ótken tulǵalardy eske alý halqymyzdyń dástúrinde bar. Ultymyzdyń daryndy jazýshylary az emes, dese de Ákim aǵanyń orny biz úshin erekshe.  Biz ádebıettiń tabaldyryǵyn endi attaǵan kezde Ákim Áshimov degen atpen el-jurtqa belgili jazýshy bolatyn. Biraq ol kisiniń ózin zor sanap, keıingi inilerine joǵarydan qaraǵan kezin kórmedik. Qataryndaı kórip, bárimizdi baýyryna basty. Taǵy bir aıtatynym, aǵamyzdyń ákesi Urtaı Ǵabıt Músirepovtiń dosy bolǵan zııaly adam edi. Sol kisilerden Ákim aǵamyzdyń boıyna kisilik qasıet, qarapaıymdylyq pen meıirimdilik daryǵan dep oılaımyn. Mine, eskertkish taqta ashý arqyly aǵamyzdyń ekinshi, ıaǵnı máńgilik ómiriniń bastal­ǵanyna kýá bolyp otyrmyz», dedi jazýshy.

Eskertkish taqtanyń ashylýyn­da Senat depýtaty Darhan Qydyráli Senat tóraǵasy Máýlen Áshimbaevtyń júrek­jardy sálemin jetkizip, Ákim Tarazı esimin el esinde máńgilikke qal­­dyrý maq­­satyndaǵy jumystyń bas­­talǵanyna rızashy­ly­ǵyn bil­dirdi. Bolashaqta qalam­ger turǵan úıdiń mańyna jańadan salynǵan mektepke Ákim Tarazı atyn berý týraly bastama kóterýge bolatynyn da tilge tıek etti. Al Májilis depýtaty Amanjol Áltaev bú­gin­gi kúnniń erekshe kúlimdep turýyn Ákim Tarazıdyń jaıdary minezimen baılanystyra kelip: «Keıingi urpaqqa ataly jyly sózin aıtatyn aqsaqaldary joq zamanda Ákim aǵanyń «aınalaıyn» degen sózin saǵynamyz. Sol sózin estigende at mingendeı arqalanyp qalýshy edik», dedi.

Eskertkish taqta ashylǵannan keıin is-shara Kúlásh Baıseıitova atyndaǵy Qazaq ulttyq óner ýnıversıtetinde jalǵasty. Jurt­shylyq «Shabyt» atap ketken óner ordasyndaǵy eń úlken Májilis zaly Ákim Tarazı atyna berildi.

Ýnıversıtet rektory Ǵalym Ahmedııarov: «Aǵamyzdyń jary Roza Muqanova bizge kelip, qalam­gerdiń esimin ulyqtaý maqsatynda bir aýdıtorııanyń ataýyn Ákim Tarazı atyna berýge usynys jasady. Biz oqý ordasynyń damýyna eren eńbegi sińgen jazýshynyń esimi shaǵyn aýdıtorııadan góri ýnıversıtet ǵımaratyndaǵy eń úlken májilis zalyna laıyq dep taptyq», dedi. Al Májilis depýtaty Janarbek Áshimjan Ákim Tarazı bastaǵan qalamgerlerdiń elimizdiń azattyq alý jolyndaǵy eńbegine taldaý jasady. «Eskertkish taqta­nyń ashylýy men májilis zalyna Ákim Tarazıdyń esiminiń berilýi ulttyń ónerine jasalǵan qurmet dep baǵalaýymyz kerek. Qazaq eliniń táýelsizdik alý jolynda qanshama qalam­­ger­lerimiz kúresti. Sonyń biregeıi Ákim Tarazı ekenine kúmán joq», dedi.

Qazaqstannyń halyq ártisi, Qazaqstannyń Eńbek Eri Aıman Musaqojaeva Ákim Tarazıdy Kúlásh Baıseıitova atyndaǵy Qazaq ulttyq óner ýnıversıtetine qyzmetke shaqyrǵanyn, «Eńbek Eri» ataǵyn alǵanda ujym bolyp qýanǵanyn aıtyp, maǵynaly esteligin jetkizdi.