Jetisý halqy kópten kútken Taldyqorǵan – Úsharal magıstraldy gaz qubyrynyń qurylysy belgilengen merziminen erte aıaqtaldy. Úsharal avtomatty gaz taratý stansasynda óńirdegi alty birdeı jańa gaz beketiniń alaýy tutandy. Osylaısha, bir mezette alystaǵy eldi mekenderge kógildir otynnyń alǵashqy legi kelip jetti. Jobany Memleket basshysynyń tapsyrmasyna sáıkes «QazaqGaz» ulttyq kompanııasy júzege asyrdy.
Bul aıtýly sátti shalǵaıdaǵy aýyl turǵyndary qanshama jyldan beri saryla kútti. Oblys ákimi Beıbit Isabaev el aralaǵan shaqta da aldymen kóteretin másele de osy – tabıǵı gaz. 2024 jylǵy tamyzda bastalǵan qurylys aıasynda uzyndyǵy 302,4 shaqyrymdyq gaz qubyry tartylyp, «Qapal», Jansúgirov, Sarqan, Qoılyq, Qabanbaı, Úsharal eldi mekenderinde alty avtomatty gaz taratý stansasy (AGTS) boı kóterdi. Bul jobanyń nátıjesinde Aqsý, Sarqan jáne Alakól aýdandaryndaǵy 80-nen astam eldi mekenniń 140 myńǵa jýyq turǵyny tabıǵı gazben qamtylmaq. Qazir osy aýyldarǵa gaz tartý boıynsha jobalyq-smetalyq qujattar daıyndalýda, al kelesi jyldan bastap qurylys jumystary bastaý alady.
Saltanatty jıynda sóz alǵan oblys basshysy jetisýlyqtardy úlken qýanyshymen quttyqtap, jobany merziminen buryn aıaqtaǵan «QazaqGaz» kompanııasyna alǵysyn bildirdi.
– Taldyqorǵan – Úsharal magıstraldy gaz qubyry qurylysynyń merziminen buryn aıaqtalýyna yqpal etken «QazaqGaz» kompanııasyna Jetisý oblysynyń turǵyndary atynan alǵysymdy bildiremin. Biz aldaǵy ýaqytta da óńirdi gazdandyrýdy ári qaraı jalǵastyramyz. О́ıtkeni tabıǵı gaz berý – halyqtyń ómir súrý deńgeıin arttyrýmen qatar, ekonomıkaǵa úlken áser etetin strategııalyq basymdyqtyń biri. Eń aldymen gazǵa aýrýhana, emhana, mektep, balabaqsha, mádenıet úıleri, sport nysandary sekildi áleýmettik nysandardy qosamyz. Turǵyndardyń da kógildir otynǵa qosylýyna múmkindik jasalady. Oǵan qosa ónerkásiptiń, shaǵyn jáne orta bıznestiń damýyna yqpal etip, jańa jumys oryndarynyń qurylýyna jol ashady, – dedi B.Isabaev.
«Samuryq-Qazyna» UÁQ» AQ Strategııa jáne aktıvterdi basqarý jónindegi basqarýshy dırektory Eljas Otynshıev atalǵan jobanyń áleýmettik mańyzdylyǵyna toqtaldy.
– «Samuryq-Qazyna» qory ekonomıkanyń túrli salasynda, ásirese munaı-gaz, energetıka baǵytynda aýqymdy bastamalardy júzege asyryp jatyr. Sondaı jobalardyń biri – Taldyqorǵan-Úsharal gaz qubyry. Bul – óte mańyzdy joba. Elge gaz kelse, halyqtyń áleýmettik jaǵdaıy jaqsarady. Ekologııa jaqsarady. О́ńirge ınvestısııa quıylady, – dedi ol.
Munan soń sóz alǵan «QazaqGaz» UK» AQ basqarma tóraǵasynyń strategııa jáne ınvestısııalar jónindegi orynbasary Akbar Tólegenov jańa gaz qubyrynyń jelilik bóligi men bir mezgilde qatar salynǵan AGTS-tiń qurylys jumystarynyń barysy erekshe baqylaýda bolǵanyn basa aıtty.
– Sonyń nátıjesinde jańa gaz qubyry jáne barlyq 6 AGTS josparlanǵan merzimnen bir jyl tórt aıǵa erte daıyn boldy. Osylaısha, «QazaqGaz» osy óńirdi gazdandyrýdyń irgetasyn qalap, jumystyń negizgi kóp eńbekti qajet etetin bóligin oryndady. Qazir gaz qubyrynyń taratý jelilerin salý boıynsha qurylys-montajdaý jumystaryna arnalǵan qujattar boıynsha memlekettik saraptamanyń oń qorytyndysyn kútip otyrmyz, – deı kele A.Tólegenov aýdan turǵyndaryn qýanyshtarymen quttyqtap, tilegin bildirdi.
Osy jıynda «Qapal», «Jansúgirov», «Sarqan», «Qoılyq», «Qabanbaı» AGTS-teri telekópir arqyly qosylyp, stansalar alaýyn jaqty, sońynda «Úsharal» AGTS-inde iske qosý tetigi basylyp, alaý laýlady.
Sharanyń resmı bóliginen keıin oblys ákimi jınalǵan aýdan halqymen tildesti. О́ńirdegi gazdandyrý, jol jóndeý, turǵyn úı qurylysy, eldi mekenderdi abattandyrý sııaqty atqarylyp jatqan mańyzdy ister jaıly qysqasha baıandap berdi. Bul sharalardyń barlyǵy is júzinde halyq qolmen ustap, kózben kóretin naqty sharalardyń jemisi ekenin aıtty. Aýdan turǵyndary Sataı Bekbolatov, Qońyrjaı Qystalasova, Uldash Bıpajanova, Erik Jýanyshbaev qatarly basqa da azamattar pikir bildirip, rızashylyǵyn jetkizdi. Solardyń biri – Úsharal qalasynyń turǵyny Áben Saqypov.
– 1980 jyldan beri Úsharalda turamyn. Biz osy kúndi uzaq kúttik. Alakól óńiriniń qysy qatty, keıde 7-8 aıǵa deıin ot jaǵatyn kezimiz bolady. Nemerelerimiz tońyp qalmasyn dep tań bozynan ot jaǵamyz. Bir qysta segiz tonnaǵa deıin kómir jaǵamyz, oǵan qosa aǵash otyn daıyndaımyz. Kómir jaǵyp, kúlin shyǵarý egde jastaǵy adamdarǵa ońaı emes. О́zimiz úlken kóshelerdiń birinde turatyndyqtan, gazǵa alǵashqylardyń biri bolyp qosylýǵa múmkindigimiz bolady dep oılaımyn. Shalǵaı aýdanǵa gaz kelgenine rızamyz, – deıdi ol.
Aıta keteıik, Sarqan aýdanynda da eki avtomatty gaz taratý stansasynda (AGTS) kógildir otyn kókke kóterildi. Onyń biri – Sarqan qalasynyń mańynda, ekinshisi – Baqaly aýylynyń tusynda ornalasqan.
Sarqan aýdanyndaǵy saltanatty rásimge aýdan ákimi Ǵalymjan Mamanbaev qatysyp, kógildir otynnyń alaýyn jaǵyp, jurtshylyqty bul mańyzdy tarıhı sátpen quttyqtady. Bul joba óńir halqynyń ómir sapasyn arttyryp, áleýmettik nysandar men kásipkerliktiń damýyna jańa serpin bereri sózsiz.
О́ńir ákiminiń baspasóz qyzmetiniń málimetinshe, jalpy oblysta gazdandyrý isi óńirde qarqyndy júrgizilip jatyr. Máselen, oblys qurylǵan kezde tek 5 eldi meken gazdandyrylsa (27%), atqarylǵan jumystardyń nátıjesinde búginde 84 eldi mekenniń 404 myńnan astam turǵyny kógildir otynǵa qol jetkizdi (58,2%). Jyl sońyna deıin Panfılov – Kerbulaq – Taldyqorǵan aralyǵyndaǵy taǵy 42 eldi meken gazben qamtylyp, gazdandyrý deńgeıi 72% jetedi (126 eldi meken). Al 2027 jyldyń sońyna qaraı oblysta gazdandyrýǵa jatatyn 200-den astam eldi mekenniń 630 myń turǵyny gazǵa qosylýǵa múmkindik alady (91%).
Jetisý oblysy