Bishkektegi Qyrǵyz Respýblıkasynyń Ulttyq tarıhı mýzeıinde «Ǵasyrlar izimen: Qazaqstan tarıhynyń beınesi» atty fotoqujattyq kórme esik ashty. Almatydaǵy Ulttyq ortalyq mýzeı muryndyq bolǵan aýqymdy joba XIX ǵasyrdan XX ǵasyrdyń sońyna deıingi Qazaqstannyń tarıhı-mádenı murasynan syr shertedi, dep jazady Egemen.kz.
Halyqaralyq mádenı yntymaqtastyq aıasynda saltanat qurǵan taǵylymdy sharanyń ashylý saltanatyna baýyrlas elde turatyn qandastar men qyrǵyz halqynyń zııaly qaýym ókilderi qatysty. Kórmege qoıylǵan túpnusqalyq fotoqujattarda qazaq halqynyń dástúrli ómir saltynyń erekshelikteri, ákimshilik jáne áleýmettik reformalar, ındýstrııalandyrý, ujymdastyrý, ónerkásip pen basqa da salalardyń damý kezeńderi jan-jaqty kórinis tabady. Qujattar qazaq biregeıliginiń qalyptasý joldaryn, áleýmettik qurylym men mádenı tájirıbelerdegi ózgeristerdi jáne ár dáýirdegi kúndelikti turmysty aıqyn beıneleıdi. Mýzeı ǵalymdary, Ulttyq ortalyq mýzeı qorynan ákelingen fotomaterıaldar eldiń tarıhy men mádenı damýyna jańa kózqaraspen qaraýǵa jol ashatynyn aıtady.
«Mundaı halyqaralyq mazmuny baı jobalar tarıhy tamyrlasyp jatqan týysqan elderdiń mádenıeti men ónerine baıypty kózqaraspen qaraýǵa múmkindik bermek. Kórmede usynylǵan fotoqujattar qoǵamdaǵy aýqymdy ózgeristerdi, mádenı serpilisterdi kórsetedi. Qyrǵyz aǵaıyndardyń ystyq yqylasyna tánti boldyq. Jaýapty vedomstva ókilderi kórmeniń ashylýyna arnaıy kelip, eki el dostyǵy haqynda paıymdy pikir aıtty. Jobanyń joǵary deńgeıde ótýine qos taraptaǵy Elshilikter de eleýli úles qosty. Kúni búgin Qyrǵyzstanda 37 myńǵa jýyq qandasymyz turatyn bolsa, kórmeni tamashalaýǵa eldiń túkpir-túkpirinen júzdegen baýyrlarymyz arnaıy keldi. Usynylyp otyrǵan materıaldar Qazaqstannyń tarıhı tájirıbesin tereńirek túsinýge, dástúr sabaqtastyǵyn jáne onyń ulttyq biregeılikti qalyptastyrýdaǵy yqpalyn ǵylymı turǵyda aıqyndaýǵa múmkindik beredi», deıdi QR Ulttyq ortalyq mýzeıi dırektorynyń orynbasary Araı Baqytqyzy.
Ekspozısııanyń eleýli bóligi qazaq mádenıetiniń kórnekti tulǵalary – Abaı Qunanbaıuly, Jambyl Jabaev, Dına Nurpeıisova, Kenen Ázirbaev paıdalanǵan mýzykalyq aspaptardyń kóshirmelerin qamtyǵan. Bul biregeı jádigerler tarıhı-mádenı qundylyq retinde dáriptelip, qazaqtyń mýzykalyq murasynyń baılyǵyn pash etedi. Sondaı-aq kórmede qazaqtyń dástúrli oryndaýshylyq óneriniń erekshe túri – «orteke» usynyldy. Ol mýzykalyq, teatrlyq jáne bı elementterin ushtastyrǵan sınkretti óner túri. Bul ónerde aǵashtan jasalǵan teke beınesi dombyra únimen úndesip, qımyl-qozǵalys arqyly adam men tabıǵattyń úılesimin kórkem jetkizedi.