Google Translate qyzmetine Gemini-diń keńeıtilgen múmkindikteri ıntegrasııalanyp, til úırený quraldary jaqsartyldy, dep habarlaıdy Egemen.kz.
Júıe ár adamnyń sóıleý yrǵaǵyn saqtaı otyryp aýdarady. Bul suhbatty baqylaýdy nemese kimniń ne aıtyp jatqanyn túsinýdi jeńildetedi.
«Basqa tilde áńgimelesýge tyrysyp jatsańyz da, sheteldegi baıandamany nemese dáristi tyńdasańyz da, tipti bóten tildegi teleshoýdy nemese fılmdi kórseńiz de, qulaqqapty taǵyp, Translate qoldanbasyn ashyp, «Live Translate» túımesin bassańyz boldy, aýdarmany ózińizge yńǵaıly tilde tyńdaı alasyz», dep málimdedi Roýz Iаo.
Jańa júıe AQSh, Meksıka jáne Úndistandaǵy Android qoldanbasynda qoljetimdi. Ol kez kelgen qulaqqappen jumys isteıdi jáne 70-ten astam tildi qoldaıdy. Bul fýnksııa 2026 jyly iOS platformasyna jáne basqa elderge de engiziledi.
Translate qyzmetine engiziletin Gemini-diń keńeıtilgen múmkindikteri mátindi dál aýdarma jasaýǵa kómektesedi. Olar jargon, ıdıoma nemese turaqty sóz tirkesteriniń aýdarmasyn jaqsartady. Bul júıe AQSh pen Úndistanda qoljetimdi jáne aǵylshyn tilinen ıspan, arab, qytaı, japon jáne nemis sııaqty 20-ǵa jýyq tilge aýdarmany qamtamasyz etedi. Android, iOS jáne veb-nusqada qoldanýǵa bolady.
Kompanııa sonymen qatar til úırenýge arnalǵan quraldaryn Germanııa, Úndistan, Shvesııa jáne Taıvandy qosa alǵanda, 20-ǵa jýyq jańa elge keńeıtti.
Sondaı-aq aýyzeki sóıleý tájirıbesine negizdelgen keńester alýǵa múmkindik beretin keri baılanys júıesi iske qosyldy. Al Google til úırenýmen qansha kún aınalysqanyńyzdy qadaǵalaıtyn fýnksııany engizdi. Bul úderisti baqylaýdy jáne sabaqtardyń turaqtylyǵyn saqtaýdy jeńildetedi.