Májilis depýtaty Erlan Saırov Úkimet basshysy Oljas Bektenovtyń atyna depýtattyq saýal joldap, eldegi «rýshyldyq» psıhologııasynyń órshýine baılanysty dabyl qaqty. Depýtat ulttyq birlikke qaýip tóndiretin kontentterge tyıym salýdy talap etti, dep habarlaıdy Egemen.kz.
Erlan Saırovtyń aıtýynsha, Qazaqstan 30 jyl ishinde ózin «memleket qurýǵa qabiletti ult» retinde dáleldegenimen, memlekettilikti saqtap turý ár azamattyń sanasyndaǵy kúresten bastalady. Sońǵy kezderi áleýmettik jelilerde, ónerde jáne kásipkerlikte rýlyq bólinýdi nasıhattaıtyn tendensııalar beleń alǵan.
«Memleketti qurýdan góri, memlekettilikti ustap turý qıyn. Memlekettilikti ustap turý úshin kúres árbir azamattyń sanasynan bastalady. Bizdiń árqaısymyz jalpy memlekettik «TÁÝELSIZ QAZAQSTAN» jáne jalpyulttyq «Men Qazaqpyn» psıhologııasyn boıymyzǵa sińirsek qana Táýelsiz Qazaqstandy saqtap qalamyz. Rýlyq sana halqymyzdyń birligine syna salyp, ulttyq birlikti shashyratyp jiberýge qabiletti qubylys. Sońǵy kezderi áleýmettik jelide, ónerde rýshyldyq tendensııa múldemge órship ketti. Bul memleketimiz úshin tekeleı qaýip! Atalarymyz «Úı artynda kisi bar» dep jıi qaıtalaıtyn. Bul sózdiń mánisi qazaqtyń júris-turysyn, ózara qarym-qatynasyn syrttan baqylap, barlap otyratyn kúshter kóp. Olar bizdiń ishimizdegi osal jerlerdi izdep, sony qozdyrýǵa tyrysyp otyrady. Sondyqtan Rýshyldyq tendensııa qoǵam ishinde memlekettik oılaý qabiletin korrozııaǵa ushyratyp, memlekettilikti shashyratýǵa ákeletin qaýipti qubylys», dedi depýtat.
Depýtattyq saýalda jekelegen kontent óndirýshiler men kásipkerlerdiń rý ataýlaryn brend retinde paıdalanyp, kıim-keshekke jazyp satýy, sondaı-aq kıno ındýstrııasyndaǵy keleńsizdikter qatań synǵa alyndy. Ásirese rýlardy salystyratyn, kemsitetin jáne Qazaqstan kartasyn úsh júzge bólip kórsetken jańa fılmniń prokatqa shyǵýy «bassyzdyq» dep baǵalandy.
Bul rette E. Saırov Úkimetke kelesi naqty sharalardy qabyldaýdy usyndy:
Arnaıy komıssııa qurý: Aqparat jáne mádenıet mınıstrligi janynan kınoprokatqa shyǵatyn otandyq fılmderdiń mazmunyn aldyn ala kórkemdik-estetıkalyq, ıdeologııalyq jáne ulttyq birlik turǵysynan saraptaıtyn turaqty komıssııa jumysyn iske asyrý. Naqty tosqaýyl qoıý: «Ulttyq kod» pen «mádenı erekshelik» uǵymyn jeleý etip, qoǵamdy bólshekteýge, rýshyldyq pen jikshildikti nasıhattaıtyn áreketterge zań júzinde tosqaýyl qoıý. Ideologııalyq kontentti arttyrý: Mádenı salada jáne áleýmettik jelide Qazaqstan halqynyń tutastyǵyn dáripteıtin, jalpyulttyq «Biz Qazaqpyz» degen maǵynadaǵy mazmundy kóbeıtýge kirisý.Synǵa qalǵan «Rýyń kim» fılmi prokattan alyndy
Erlan Saırov ult múddesi men memleket tutastyǵy jolynda kez kelgen synǵa daıyn ekenin jetkizdi. Ol traıbalızm máselesinde eshqandaı kompromıss bolmaýy tıis ekenin jáne arandatýshylyq materıaldarǵa tolyqtaı tyıym salynýy kerektigin qadap aıtty.
Eske salaıyq, Májilistiń jalpy otyrysynda depýtat Erlan Saırov úlken ekranǵa shyqqan «Rýyń kim» fılminiń qajetsiz taqyrypty arqaý etkenine nazar aýdarǵan edi.