Oblystyq memlekettik arhıvine Qazaqstannyń Qurmetti jýrnalısi, qalamger Sultan Kemelbaevtyń jeke qujattary tapsyryldy. Saltanatty is-sharaǵa qalamgerdiń aǵaıyn-týysy, áriptesteri, oblystyq mádenıet jáne qujattama arhıvter basqarmasy men arhıv qyzmetkerleri qatysty.
Oblystyq mádenıet, arhıvter jáne qujattama basqarmasynyń basshysy Ǵalymjan О́telbaıuly saltanatty is-sharaǵa kelip, quttyqtaý sózin aıtty.
– Bul is-shara tek bir adamnyń ǵumyryn ulyqtaý emes, sol tulǵanyń qalamyna arqaý bolǵan tutas óńirdiń tarıhyna taǵzym etý. О́tkendi ulyqtap, keleshekke izgilikpen qadam basý – jaqsylyqtyń nyshany. Sultan Kemelbaevtyń ómirlik joly – mamandyǵyna adaldyq pen kásibıliktiń ozyq úlgisi. Ol jýrnalıstıkadaǵy eńbegimen, elge degen mahabbatymen jas urpaqtyń jadynda saqtalmaq, – dedi Ǵalymjan О́telbaıuly.
Sońynan óshpes iz qaldyrǵan qalamgerdiń jeke muraǵatyndaǵy qujattardy oblystyq memlekettik arhıvke otbasy tapsyrdy. Jalpy 30-ǵa jýyq qujat. Qyzy Sáýle Kemelbaeva bul qadamdy ákeleriniń elge etken eńbegi el jadynda saqtalýy úshin asa mańyzdy dep otyr.
– Ákemizdiń jeke qujattaryn túgel tapsyrdyq. О́mirbaıany, shyǵarmashylyq joly, ákimshilik jumystaǵy qujattary, barlyǵy derlik arhıvke tabystaldy. Ákem óziniń sanaly ǵumyryn, kúsh-qaıratyn oblystyń órkendeýine arnady. Jýrnalıstıka salasynda ter tókti. О́ńirdiń barlyq jetistigin, máselelerin, kúndelikti ómirin qalamyna arqaý etti. О́zi uzaq jyl qyzmet atqarǵan oblystyq «Indýstrıalnaıa Karaganda» gazeti de mańyzdy qujattaryn tabys etti. Maqalalar, ocherkter endi jas urpaqtyń ıgiligine jaraıdy dep oılaımyz, – dedi Sáýle Kemelbaeva.
Sultan Kemelbaev oblystyq «Indýstrıalnaıa Karaganda» gazetinde 13 jyl bas redaktor qyzmetin abyroımen atqardy. 1946 jyly 6 qyrkúıekte Balqash qalasynda týǵan. Eńbek jolyn Balqashtaǵy ken oryndarynyń birinde elektrık bolyp bastaǵan. Lenınıgradtaǵy memlekettik ýnıversıtettiń jýrnalıstıka kafedrasyn támamdaǵan talapty jýrnalıst «Indýstrıalnaıa Karaganda» gazetine 1974 jyly tilshi bolyp qyzmetke ornalasqan. Almatydǵy joǵary partııalyq mekteptiń de túlegi. «Trýd», «Rabochaıa trıbýna», «Na gora» gazetterinde de qyzmet atqarǵan. «Vechernıaıa Karaganda» gazetiniń bas redaktory da bolǵan. 1993–2006 jyldar aralyǵynda «Indýstrıalnaıa Karaganda» gazetiniń ujymyn basqardy. 2006 jyly «Shahterskaıa nedelıa» gazetin de tizgindedi.
Ardager jýrnalıst, Sultan Kemelbaevtyń qalamger dosy Aman Janǵojın arhıvke tapsyrylǵan qujattar stýdentterdiń dıplomdyq jumysyna arqaý bolatynyn aıtty.
– Sultan Kemelbaev – óte bilimdi, bıik tulǵaly, eńbekqor azamat edi, kez kelgen taqyrypty jazatyn óreli jýrnalıst edi. Mundaı tulǵanyń muralary keleshekte zerttelýge tıis. Ásirese bolashaq jýrnalıster onyń eńbekterin dıplomdyq jumystaryna arqaý etip, úlgi alýy mańyzdy, – dedi Aman Janǵojın.
Sultan Kemelbaevtyń jeke muraǵat qujattarynyń oblystyq arhıvke tapsyrylýy – tulǵanyń jarqyn beınesin qurmetteýdiń ǵana emes, óńir tarıhyn baıyta túsýdiń mańyzdy qadamy. Qalamgerdiń ómir joly, jýrnalıstik eńbegi men qoǵamdyq qyzmeti bolashaq urpaqqa úlgi bolary sózsiz. Arhıvke tapsyrylǵan qujattar jas zertteýshiler men jýrnalıstıka salasynyń mamandaryna tálimdik materıal bolýmen qatar, óńirdiń rýhanı qazynasyn tolyqtyra túspek. Sultan Kemelbaevtyń qaldyrǵan murasy – onyń elge degen adaldyǵy men kásibı bıiginiń máńgilik dáleli.
Qaraǵandy oblysy