Ulttyq Ortalyq mýzeıde «Ýaqyt jańǵyryǵy» dep atalǵan sýret kórmesi ashyldy, dep jazady Egemen.kz.
Úzdik qylqalam sheberlerin bir alańda toǵystyrǵan kórme qazaq beıneleý óneriniń kórnekti tulǵalary – Hakimjan Naýryzbaev pen Moldahmet Kenbaevtyń 100 jyldyǵyna, Nıkolaı Hlýdovtyń 175 jyldyǵyna, Evgenıı Sıdorkınniń 95 jyldyǵyna, Erkin Mergenov pen Tólegen Dosmaǵambetovtyń 85 jyldyq mereıtoılaryna arnalyp otyr.
Ulttyq kórkemóner mektebiniń qalyptasýy men damýyna zor úles qosqan Hakimjan Naýryzbaev, Moldahmet Kenbaev, Nıkolaı Hlýdov, Evgenıı Sıdorkın, Erkin Mergenov jáne Tólegen Dosmaǵambetov tvorchestvolary qazaq beıneleý óneriniń tarıhynda óshpes iz qaldyrdy. Olardyń qoltańbalary kásibı qazaq beıneleý óneriniń alǵashqy býyny qalyptastyrǵan músin jáne grafıka dástúrlerin jalǵastyra otyryp, zamanaýı kórkemdik-estetıkalyq kózqaraspen jáne jańa taqyryptyq mazmunmen baıyta túsedi.
Ekspozısııaǵa 140-tan astam keskindeme, grafıka, músin, qolóner salasy boıynsha qazaqstandyq sýretshilerdiń shyǵarmashylyq týyndylary usynyldy. Kórermen 40-tan astam týyndyny onlaın formatta tamashalady. Respýblıkalyq kórmege elimizdiń barlyq óńirlerinen 135 sýretshi qatysty.
«Usynylǵan týyndylar sýretshilerdiń plastıkalyq-beınelik mánerindegi tyń jańashyl ádisterdi, tańdalǵan taqyryptardyń maǵynalyq mazmunyn, ulttyq rýhtyń lebin qazirgi zamanǵy kórkem beıneler arqyly asha túsedi. Kórermen túrli janrda ár qyrynan kórinis tapqan, kompozısııalyq jáne kollorıttik sheshimde oryn alǵan, tereń oımen aıqyndalǵan dınamıkalyq úndestik pen ózara tutastyqty biriktiretin úılesimdi týyndylardyń kýási boldy. «Ýaqyt jańǵyryǵy» atty kórme ulttyq beıneleý óneriniń sabaqtastyǵyn, shyǵarmashylyq dástúrdiń damýyn jáne qazirgi zamanǵy kórkemdik úrdistiń jańa qyrlaryn tanytatyn mańyzdy mádenı oqıǵa», deıdi ónertanýshy Gúlnar Jubanııazova.
ALMATY