Memleket basshysy Jambyl oblysynyń jurtshylyǵymen kezdesti, dep habarlaıdy Egemen.kz Aqordanyń baspasóz qyzmetine silteme jasap.
«Jambyl oblysynyń ahýaly ákim Erbol Qarashókeevtiń baıandamasyna qaraǵanda jaman emes. Biraq oblystyń aldynda mańyzdy, ózekti maqsattar tur. Bul maqsattardy tolyǵymen oryndaý – ákimniń jáne búkil qyzmetshilerdiń eń negizgi mindeti. Oblystyń ekonomıkasyn kúsheıtý kerek. Oǵan qajetti jaǵdaı da, múmkindik te bar. Belsendi jumys bastaldy», dedi Prezıdent.
Memleket basshysy jumystyń qarqynyn báseńdetýge bolmaıtynyn tilge tıek etti.
«Taraz – ultymyzdyń asqaq rýhy, baı mádenıeti, eldik muraty jáne erlik dástúri toǵysqan qala. Bul – ejelgi órkenıettiń izi qalǵan jer. Shejireli shahardyń jurtymyz úshin orny erekshe. Biz Tarazdyń eki myń jyldyq tarıhyn maqtan etemiz. Áýlıeata jerinde memlekettigimizdiń tuǵyryn nyǵaıtqan talaı tarıhı oqıǵalar boldy. Qazaq handyǵy osy aımaqta qurylǵan. Kóne qala toǵyz joldyń torabynda tur. Ejelgi Uly Jibek joly qart Qarataýdyń etegin basyp ótken. Áıgili kerýen joly jańa zamanda jańa qarqynmen damyp keledi. «Batys Eýropa – Batys Qytaı» kólik dálizi Jambyl jeri arqyly ótip jatyr. Sonyń arqasynda aımaqtyń strategııalyq mańyzy artýda. Jambyl oblysy kún ótken saıyn órkendep keledi», dedi Qasym-Jomart Toqaev.
Buǵan deıin Prezıdentke Jambyl oblysyna ınvestısııa tartý jáne agroónerkásip keshenin damytý jobalary tanystyrylǵanyn jazǵan edik. Bıyl Jambyl oblysyna 599,2 mıllıard teńge ınvestısııa tartylǵan.